തിരുവനന്തപുരം: കേരള സംസ്ഥാന മന്ത്രി സഭയിലേക്ക് കെ.ബി. ഗണേഷ് കുമാറിനെയും കടന്നപ്പള്ളി രാമചന്ദ്രനെയും ഉൾപ്പെടുത്തും. ഡിസംബർ 29 നാണ് സത്യപ്രതിജ്ഞ. എൽഡിഎഫ് കൺവീനർ ഇ.പി.ജയരാജൻ പത്രസമ്മേളനത്തിൽ എൽഡിഎഫ് തീരുമാനം അറിയിക്കുകയായിരുന്നു. മുന്നണി ധാരണപ്രകാരമാണ് മന്ത്രിസഭ പു:ന സംഘടനയെന്നും ഇ.പി. ജയരാജൻ അറിയിച്ചു.
നവകേരള സദസിന് ശേഷം മന്ത്രിസഭാ പുന:സംഘടനയുണ്ടാകുമെന്ന് നേരത്തെ സൂചനകൾ ഇടത് മുന്നണി നൽകിയിരുന്നു. തുടർന്ന് ഇന്ന് മന്ത്രിമാരായ ആന്റണി രാജുവും അഹമ്മദ് ദേവർകോവിലും മുഖ്യമന്ത്രിക്ക് രാജിക്കത്ത് നൽകി. പിന്നാലെ കെ.ബി. ഗണേഷ് കുമാറിനെയും കടന്നപ്പള്ളി രാമചന്ദ്രനെയും മന്ത്രിസഭിൽ ഉൾപ്പെടുത്തുന്നതായി എൽഡിഎഫ് കൺവീനർ വാർത്താ സമ്മേളനം വിളിച്ചുചേർത്ത് അറിയിക്കുകയായിരുന്നു.
ആന്റണി രാജു കൈകാര്യം ചെയ്തിരുന്ന ഗതാഗത വകുപ്പായിരിക്കും കെ.ബി. ഗണേഷ് കുമാറിന് ലഭിക്കുക. കടന്നപ്പള്ളിക്ക് അഹമ്മദ് ദേവർകോവിൽ കൈകാര്യം ചെയ്തിരുന്ന തുറമുഖ വകുപ്പും ലഭിക്കും.
