പ്രസവ വേദനയേക്കാൾ വലിയ വേദന ഭൂമിയിലില്ലെന്ന് നാം കേട്ടിരിക്കും. ഇരട്ടക്കുട്ടികളെ പ്രസവിക്കുന്നത് വളരെ പ്രയാസകരമായ കാര്യമാണെങ്കിലും കുഞ്ഞുങ്ങളുടെ മുഖം കാണുമ്പോൾ അമ്മമാർക്കുണ്ടാകുന്നത് ഇരട്ടി സന്തോഷാണ്. 32-കാരിയായ കെൽസി ഹാച്ചറും ഇപ്പോൾ ഇരട്ടി സന്തോഷത്തിലാണ്. രണ്ട് ദിവസത്തിനിടെ രണ്ട് പെൺകുട്ടികളുടെ അമ്മയായിരിക്കുകയാണ് ഹാച്ചർ. ദശലക്ഷം ആളുകളിൽ ഒരാൾക്ക് മാത്രമാണ് ഇങ്ങനെ പ്രസവിക്കാൻ സാധിക്കുന്നതെന്നാണ് ആശുപത്രി അധികൃതർ വ്യക്തമാക്കുന്നത്.
ഇരട്ട ഗർഭപാത്രം ഉണ്ടായതാണ് രണ്ട് കുഞ്ഞുങ്ങൾ ഓരോ ദിവസത്തിന്റെ വ്യത്യാസത്തിൽ ജനിക്കാൻ കാരണം. യൂട്രസ് ഡിഡെൽഫിസ് എന്ന രോഗമാണ് ഇത്തരം ഒരു അവസ്ഥയുടെ പ്രധാന കാരണങ്ങളിലൊന്ന്. ഭ്രൂണ വളർച്ചയുടെ സമയത്ത് മുള്ളേറിയൻ നാളികൾ ശരിയായ രീതിയിൽ സംയോജിക്കാതിരിക്കുന്നതാണ് രണ്ടാമത്തെ ഗർഭപാത്രത്തിലും ഭ്രൂണം വളരാൻ കാരണം. ഹാച്ചറിന്റെ 17-ാമത്തെ വയസിലാണ് ഇരട്ട ഗർഭപാത്രം ഇവർക്കുണ്ടെന്ന് ഡോക്ടർമാർ കണ്ടെത്തിയത്. എന്നാൽ ആർത്തവ സമയങ്ങളിലും, പ്രത്യുൽപാദന സമയങ്ങളിലും സ്ത്രീകൾക്ക് ബുദ്ധിമുട്ടുകളൊന്നും നേരിടേണ്ടി വരാറില്ലെങ്കിലും പ്രസവ സമയങ്ങളിൽ ഇത്തരത്തിൽ രണ്ട് കുട്ടികൾക്ക് പല സമയങ്ങളിലായി ജന്മം നൽകേണ്ടതായി വരാറുണ്ടെന്നും ഇത് പ്രയാസകരമായ ഒരു കാര്യമാണെന്നും ഡോക്ടർമാർ പറയുന്നു. എങ്കിലും രണ്ട് പെൺകുട്ടികൾക്കും പറയാൻ വ്യത്യസ്തതയാർന്ന അവരുടേതായ കഥകൾ ഉണ്ടെന്ന സന്തോഷത്തിലാണ് കെൽസി ഹാച്ചർ.