ഓണവും ക്രിസ്തുമസും പോലെ മുസ്ലീങ്ങളുടെ പെരുന്നാൾ എല്ലാവരും ആഘോഷിക്കാത്തത് എന്തുകൊണ്ടാണെന്ന് ബിഗ് ബോസ് താരം ഫിറോസ് ഖാൻ. മുസ്ലീങ്ങൾ ഓണവും ക്രിസ്തുമസും ആഘോഷിക്കുന്നവരാണെന്നും എന്നാൽ മറ്റ് മതക്കാർ പെരുന്നാൾ ആഘോഷിക്കുന്നില്ലെന്നും താരം പറഞ്ഞു. ഒരു ഓൺലൈൻ ചാനലിന് നൽകിയ അഭിമുഖത്തിലാണ് ഫിറോസ് ഖാന്റെ നിരീക്ഷണം. സിനിമയിലും സീരിയലിലും മതം ഉണ്ടെന്നും ഫിറോസ് പറയുന്നു.
‘എല്ലാ ഉത്സവങ്ങളും ഞാൻ ആഘോഷിക്കാറുണ്ട്. ഓണം, ക്രിസ്തുമസ് എല്ലാം ഞാൻ ആഘോഷിക്കുന്നു. ഒരുവിധം എല്ലാ മുസ്ലീങ്ങളും ഇത് രണ്ടും ആഘോഷിക്കാറുണ്ട്. പക്ഷെ, ഞാനെപ്പോഴും ആലോചിക്കും, പെരുന്നാള് വേറെ ആരും ആഘോഷിക്കുന്നില്ല. അതിന്റെ കാരണമെന്താണ്. എന്റെ വീട്ടിൽ ഓണത്തിന് ഊഞ്ഞാൽ ഇടാറുണ്ട്, സദ്യ വെയ്‌ക്കാറുണ്ട്. പക്ഷെ, പെരുന്നാൽ മറ്റ് മതങ്ങളിലുള്ളവർ ഒന്നും ആഘോഷിക്കുന്നില്ല. അത് എനിക്ക് വലിയ വിഷമം ഉണ്ടാക്കുന്നു. പെരുന്നാളും എല്ലാവരും ആഘോഷിക്കണം. എന്തുകൊണ്ടാണ് പെരുന്നാൾ ആഘോഷിക്കാത്തത്’.
‘ലോകം മുഴുവൻ തലകീഴായി തന്നെയാണ് പൊയ്‌ക്കോണ്ടിരിക്കുന്നത്. സിനിമയിലും സീരിയലിലും ജാതിയും മതവും ഉണ്ട്. ഞാൻ ഇതിന്റെയൊക്കെ സാക്ഷിയാണ്. ഞാൻ ഈ മതക്കാരനാണെന്ന് അറിഞ്ഞതുകൊണ്ട് എന്നെ വിളിക്കാത്ത ഒരു സംവിധായകനുണ്ട്. ഒരു പ്രത്യേക കാലഘട്ടത്തിലൂടെയാണ് നമ്മൾ പൊയ്‌ക്കോണ്ടിരിക്കുന്നത്. തലതിരിഞ്ഞ ലോകത്തു കൂടി ഞാൻ നേരെ നടക്കുന്നതു കൊണ്ട് എനിക്ക് തോന്നുന്നതാണോ എന്ന് അറിയില്ല’- ഫിറോസ് പറഞ്ഞു.
