ഐപിഎൽ ചോദ്യങ്ങൾ വേണ്ട, എന്റെ ടി20 ഭാവി നിങ്ങൾക്ക് ഉടനെ അറിയാം; സസ്പെൻസ് പൊളിക്കാതെ രോഹിത് ശർമ്മ

കഴിയുന്നത്ര ക്രിക്കറ്റ് കളിക്കാനാണ് ഞങ്ങൾക്ക് ആ​ഗ്രഹം…ടി20 ലോകകപ്പ് ടീമിൽ ഉണ്ടാകുമോ എന്ന ചോദ്യത്തിന് ഇതായിരുന്നു രോഹിത് ശർമ്മയുടെ മറുപടി. എന്റെ ടി20 ഭാവിയക്കുറിച്ച് വലിയ ഊഹാപോഹങ്ങൾ നടക്കുന്നുണ്ട്. അതിനുള്ള എല്ലാ ഉത്തരവും വൈകാതെ നിങ്ങൾക്ക് ലഭിക്കുമെന്നും ഇന്ത്യൻ നായകൻ പറഞ്ഞു.

അതേസമയം ഐപിഎൽ ചോദ്യങ്ങളോട് മുഖം തിരിച്ച് താരം മുംബൈ ഇന്ത്യൻസ് തീരുമാനങ്ങളിൽ അതൃപ്തി പ്രകടമാക്കി. ചില വലിയ നീക്കങ്ങൾ അണിയറയിൽ നടക്കുന്നുണ്ടെന്നാണ് സൂചന. ടി20 ലോകകപ്പ് നേടി വൈറ്റ് ബോൾ കരിയർ അവസാനിപ്പിക്കാനാകും സീനിയർ താരങ്ങളുടെ നീക്കമെന്നാണ് സൂചന. വിരാടും രോ​ഹിത്തും കുട്ടിക്രിക്കറ്റിൽ ഒരു അവസരം കൂടി പ്രതീക്ഷിക്കുന്നുണ്ട്. അതേസമയം ലോകകപ്പ് തോൽവിയിൽ നിന്ന് കരകയറാൻ വളരെയേറെ ബുദ്ധിമുട്ടിയെന്നും താരം വ്യക്കമാക്കി.

ജീവിതത്തിലും ക്രിക്കറ്റിലും ബുദ്ധിമുട്ടേറിയ കാര്യങ്ങൾ സംഭവിക്കും, പക്ഷേ അതിനേയെല്ലാം തരണം ചെയ്ത് മുന്നോട്ട് പോയേ പറ്റൂ. പ​രാജയത്തിൽ നിന്ന് മുക്തനാകാൻ കുറെയേറെ സമയമെടുത്തു. രാജ്യത്തിന് പുറത്തുനിന്നു പോലും നിരവധിപേരുടെ പിന്തുണ ലഭിച്ചു. ഇതെല്ലാം മാനസികമായി എന്നെ സഹായിച്ചു- രോഹിത് പറഞ്ഞു.