ഉണ്ണി മുകുന്ദനും രഞ്ജിത് ശങ്കറും ആദ്യമായി ഒന്നിക്കുന്ന ചിത്രമാണ് ജയ് ഗണേഷ്. വിഷു റിലീസായി എത്തുന്ന ചിത്രത്തിൽ ഉണ്ണി മുകുന്ദൻ വളരെ വ്യത്യസ്തമായ വേഷത്തിലാണ് എത്തുക. ആർഡിഎക്സ് എന്ന ചിത്രത്തിന് ശേഷം മഹിമാ നമ്പ്യാർ നായികയാകുന്ന ചിത്രം കൂടിയാണ് ജയ് ഗണേഷ്. ചിത്രത്തിന്റെ ഏറ്റവും പുതിയ പോസ്റ്റർ പുറത്തുവിട്ടു.
വീൽച്ചെയറിൽ ഇരിക്കുന്ന ഉണ്ണി മുകുന്ദന്റെ ചിത്രമാണ് പോസ്റ്ററിലുള്ളത്. പിന്നിലായി കുറച്ച് കാർട്ടൂണുകളും കാണാം. ഉള്ളിലുള്ള ശക്തിയെ പുറത്തെടുക്കുക എന്ന അടിക്കുറിപ്പോടെയാണ് ഉണ്ണി മുകുന്ദൻ ചിത്രത്തിന്റെ പോസ്റ്റർ പങ്കുവച്ചിരിക്കുന്നത്.
ഒരു ഇടവേളയ്ക്ക് ശേഷം മലയാളികളുടെ പ്രിയ നായിക ജോമോൾ ചിത്രത്തിൽ ശ്രദ്ധേയമായൊരു വേഷത്തിൽ എത്തുന്നു. ഹരീഷ് പേരടി, അശോകൻ, രവീന്ദ്ര വിജയ്, നന്ദു തുടങ്ങിയവരും ചിത്രത്തിലെ താരങ്ങളാണ്. ഡ്രീംസ് എൻ ബിയോണ്ട്, ഉണ്ണി മുകുന്ദൻ ഫിലിംസ് എന്നീ ബാനറിൽ രഞ്ജിത്ത് ശങ്കർ, ഉണ്ണി മുകുന്ദൻ എന്നിവർ ചേർന്നാണ് ചിത്രം നിർമ്മിക്കുന്നത്. ചിത്രത്തിന്റെ ഛായാഗ്രഹണം ചന്ദ്രു ശെൽവരാജാണ് നിർവ്വഹിക്കുന്നത്. ഏപ്രിൽ 11 ന് ജയ്ഗണേഷ് തീയേറ്ററുകളിലെത്തും.
