കൊൽക്കത്ത: ഐഎസ്എല്ലിൽ മറ്റൊരു പരിശീലകൻ കൂടി പുറത്തേയ്ക്ക്. മോഹൻ ബഗാൻ സൂപ്പർ ജയന്റ്സാണ് തങ്ങളുടെ പരിശീലക സ്ഥാനത്ത് നിന്ന് യുവാൻ ഫെറാൻഡോയെ മാറ്റിയതായി അറിയിച്ചത്. പരിശീലകനായുള്ള യുവാന്റെ കരാർ അവസാനിച്ചിരുന്നു. നിലവിൽ ഇന്ത്യൻ സൂപ്പർ ലീഗിലും ഡ്യൂറൻഡ് കപ്പിലും ചാമ്പ്യന്മാരാണ് മോഹൻ ബഗാൻ. രണ്ട് കിരീടങ്ങളും മോഹൻ ബഗാന് നേടി കൊടുത്തത് യുവാൻ ഫെറാൻഡോയാണ്. എന്നാൽ ഈ സീസണിൽ മികച്ച പ്രകടനം യുവാന് കീഴിൽ മോഹൻ ബഗാന് കാഴ്ചവയ്ക്കാൻ സാധിച്ചിരുന്നില്ല.
യുവാന് പകരം പുതിയ പരിശീലകനായി അൻറോണിയോ ഹബാസിനെയാണ് സൂപ്പർ ജയന്റ്സ് ടീമിലെത്തിച്ചിരിക്കുന്നത്. 2014ലും 2019-20 സീസണിലും മോഹൻ ബഗാന് കീരിടങ്ങൾ നേടിക്കൊടുത്ത പരിശീലകനാണ് അന്റോണിയോ ഹബാസ്. പുതിയ പരിശീലകന് കീഴിലാകും കലിംഗ സൂപ്പർ കപ്പിൽ മോഹൻ ബഗാൻ മത്സരിക്കുക.ഐഎസ്എൽ പോയിന്റ് പട്ടികയിൽ നിലവിൽ അഞ്ചാം സ്ഥാനത്താണ് മോഹൻ ബഗാൻ. ബെംഗളൂരു എഫ്സിയും മുംബൈ സിറ്റിയും നേരത്തെ തങ്ങളുടെ പരിശീലകരെ മാറ്റിയിരുന്നു.