2023-ലെ ഐസിസിയുടെ അവാർഡുകൾക്കായുള്ള വിവിധ പട്ടികകളിലേക്ക് നാമനിർദ്ദേശം ചെയ്യപ്പെട്ട് ഇന്ത്യൻ താരങ്ങൾ. മികച്ച ടി20 താരത്തിനുള്ള അവാർഡിനായി സൂര്യകുമാർ യാദവും എമർജിംഗ് താരത്തിനുള്ള പുരസ്കാരപട്ടികയിൽ യുവതാരം യശസ്വി ജയ്സ്വാളുമാണ് ഉൾപ്പെട്ടിരിക്കുന്നത്.
സൂര്യകുമാർ യാദവിനെ കൂടാതെ മറ്റ് മൂന്ന് താരങ്ങളാണ് പട്ടികയിൽ ഇടം പിടിച്ചത്. കഴിഞ്ഞ വർഷം 17 മത്സരങ്ങളിൽ നിന്ന് 48.86 ശരാശരിയിൽ 733 റൺസാണ് സൂര്യകുമാർ യാദവ് നേടിയത്. സിംബാബ്വെയുടെ സിക്കന്ദർ റാസ (515 റൺസ്), ഉഗാണ്ടയുടെ അൽപേഷ് രാംജാനി (55 വിക്കറ്റ്), ന്യൂസിലൻഡിന്റെ മാർക്ക് ചാംപൻ(556 റൺസ്) എന്നിവരാണ് പട്ടികയിലുള്ള മറ്റ് താരങ്ങൾ. അസ്സോസ്സിയേറ്റ് രാജ്യങ്ങളിൽ നിന്നും ഐസിസിയുടെ ഏതു ഫോർമാറ്റിലും Player of the Year പുരസ്കാരത്തിലേക്ക് നോമിനേറ്റ് ചെയ്യപ്പെടുന്ന ആദ്യത്തെ ഉഗാണ്ടൻ താരമാണ് അൽപേഷ് രാംജാനി.
2023 ലെ ഐസിസിയുടെ എമർജിംഗ് ക്രിക്കറ്റർ ഓഫ് ദി ഇയർ താരത്തിനുള്ള ചുരുക്കപട്ടികയിലാണ് യുവതാരം യശസ്വി ജയ്സ്വാൾ ഉൾപ്പെട്ടിരിക്കുന്നത്. രചിൻ രവീന്ദ്ര (ന്യൂസിലൻഡ്), ജെറാൾഡ് കോട്ട്സീ(ദക്ഷിണാഫ്രിക്ക), ദിൽഷൻ മധുശങ്ക (ശ്രീലങ്ക) എന്നിവരാണ് പട്ടികയിൽ ഇടം പിടിച്ചിരിക്കുന്ന മറ്റുചില താരങ്ങൾ. 22 കാരനായ ജയ്സ്വാൾ 70.75 ശരാശരിയിൽ ടെസ്റ്റ് മത്സരങ്ങളിൽ നിന്ന് 283 റൺസും ടി20 കളിൽ നിന്ന് 430 റൺസുമാണ് കഴിഞ്ഞ വർഷം നേടിയത്.