പോയവര്ഷത്തിലാണ് ഒരു മലയാളി താരത്തിന്റെ ആദ്യ അന്താരാഷ്ട്ര സെഞ്ച്വറി പിറന്നത്. സഞ്ജു സാംസനാണ് കന്നി സെഞ്ച്വറി നേടി ദക്ഷിണാഫ്രിക്കയ്ക്കെതിരായ ഏകദിന പരമ്പരയില് തിളങ്ങി, ഇന്ത്യക്ക് വിജയവും പരമ്പരയും സമ്മാനിച്ചത്. പാളില് നടന്ന നിര്ണായക മത്സരത്തില് മൂന്നാം നമ്പറില് ഇറങ്ങിയ സഞ്ജു 108 റണ്സുമായി നീലപ്പടയുടെ നട്ടെല്ലായി.
90-കളില് നില്ക്കവെ തനിക്കുണ്ടായ ചിന്തകളെക്കുറിച്ച് വെളിപ്പെടുത്തിയിരിക്കുകയാണ് സഞ്ജു. കോഴിക്കോട് നടന്ന ഒരു സ്വകാര്യ ചടങ്ങിലാണ് താരം ഇക്കാര്യത്തെപ്പറ്റി വാചാലനായത്. വ്യക്തിഗത സ്കോര് 97ല് നില്ക്കേ തനിക്കു കുറച്ചു ബോളുകളില് സ്ട്രൈക്ക് ലഭിച്ചില്ല. അപ്പോള് ചിന്തിച്ച സിക്സറടിച്ച് സെഞ്ച്വറി പൂര്ത്തിയാക്കുന്നതിനെക്കുറിച്ചായിരുന്നു. എന്നാല് പിന്നീടിത് വേണ്ടെന്നുവച്ചു.
97 റണ്സിലെത്തിയതിനു ശേഷം രണ്ടോവറുകള് സ്ട്രൈക്ക് ലഭിച്ചില്ല. നോണ് സ്ട്രൈക്കറുടെ എന്ഡില് നില്ക്കേ പലകാര്യങ്ങളും മനസിലൂടെ പോകും. അവിടെ നില്ക്കുമ്പോഴാണ് ഡെയ്ഞ്ചര്. സിക്സറടിച്ചാലോയെന്നു ചിന്തിച്ചു. പക്ഷെ എന്റെ കുടുംബത്തിന്റെയും ഭാര്യയുടെയുമെല്ലാം പ്രാര്ഥന മനസില് കേള്ക്കാന് കഴിഞ്ഞു. ഇതാണ് എന്നെ ആ ചിന്തയില് നിന്ന് പുറത്തുകടത്തിയത്-സഞ്ജു പറഞ്ഞു.
സെഞ്ച്വറി നേടിയ ശേഷം നാട്ടിലെത്തിയപ്പോള് ആരാധകര് പറഞ്ഞിരുന്നു നിങ്ങള് 90കളില് നിന്നപ്പോള് തങ്ങളും പ്രാര്ത്ഥനയിലായിരുന്നുവെന്ന്.അത് വലിയൊരു കാര്യമല്ലേ. എന്റെ വ്യക്തിഗത നേട്ടത്തിനായി അവരും പ്രാര്ത്ഥിക്കുന്നു- സഞ്ജു കൂട്ടിച്ചേര്ത്തു. 110 പന്തില് നിന്നായിരുന്നു സഞ്ജുവിന്റെ കന്നി അന്താരാഷ്ട്ര സെഞ്ച്വറി.കേശവ് മഹാരാജെറിഞ്ഞ 44ാ-മത്തെ ഓവറിലായിരുന്നു സെഞ്ച്വറി പൂര്ത്തിയാക്കിയത്. ആറു ഫോറും മൂന്നു സിക്സറുമടക്കമാമ് 108 റണ്സെടുത്ത്.
