ബഹിരാകാശത്ത് വൈദ്യുതി ഉത്പാദിപ്പിക്കുന്നതിൽ വിജയം കണ്ട് ഇന്ത്യൻ ബഹിരാകാശ ഏജൻസി ഐഎസ്ആർഒ. ഫ്യുവൽ സെൽ പവർ സിസ്റ്റത്തിന്റെ പരീക്ഷണം വിജയിച്ചിരിക്കുന്നുവെന്നാണ് ഇസ്രോ അറിയിച്ചത്. പരീക്ഷണ ഘട്ടത്തിൽ 350 കിലോമീറ്റർ ഉയരത്തിൽ 180 വാൾട്ട് വൈദ്യുതിയാണ് ഫ്യുവൽ സെൽ ഉത്പാദിപ്പിച്ചത്.
ഐഎസ്ആർഒയുടെ വിക്രം സാരാഭായ് സ്പേസ് സെന്ററാണ് ഫ്യുവൽ സെൽ നിർമ്മിച്ചത്. ഹൈഡ്രജനും ഓക്സിജനും ഉപയോഗിച്ചാണ് വൈദ്യുതിയുടെ ഉത്പാദനം. വൈദ്യുത ഉത്പാദന വേളയിൽ ഇതിൽ നിന്നും പുറന്തള്ളുന്നത് ജലം മാത്രമാണെന്നും മറ്റ് വാതകങ്ങളൊന്നും പുറന്തള്ളുന്നില്ലെന്നും ഇസ്രോ അറിയിച്ചു.
പരീക്ഷണം വിജയിച്ചതോടെ ഭാവി ബഹിരാകാശ പദ്ധതികളിലും ഇത് ഭാഗമായേക്കുമെന്നാണ് വിലയിരുത്തൽ. ജനുവരി ഒന്നിന് പിഎസ്എൽവി സി58 എക്സ്പോസാറ്റ് റോക്കറ്റ് ഇസ്രോ വിക്ഷേപിച്ചിരുന്നു. റോക്കറ്റിന്റെ അവസാന ഭാഗത്താണ് പിഒഇഎം മൊഡ്യൂൾ ഘടിപ്പിച്ചിരുന്നത്. ഇതിലാണ് 10 ഉപഗ്രഹങ്ങൾ സ്ഥാപിച്ചിരുന്നത്. ഉപഗ്രഹങ്ങളിൽ രണ്ടെണ്ണത്തിന്റെ നിർമ്മാണം നിർവഹിച്ചിരുന്നത് വിഎസ്എസ്സി ആണ്. ഇവയിലൊന്നായ എഫ്സിപിഎസ് പരീക്ഷണം വിജയിച്ചുവെന്നാണ് ഇസ്രോ അറിയിച്ചത്.
