സമൂഹമാദ്ധ്യമങ്ങൾ വഴിയുള്ള തട്ടിപ്പുകൾ വർദ്ധിച്ച് വരുന്ന സാഹചര്യമാണ് ഇന്നുള്ളത്. അത്തരത്തിൽ ഇൻസ്റ്റഗ്രാം വഴിയും നിരവധി പേരാണ് ഇത്തരത്തിൽ തട്ടിപ്പുകൾക്ക് ഇരയാകുന്നത്. ഗീവ് എവേ, മത്സരങ്ങൾ, ഫിഷിംഗ് അറ്റാക്കുകൾ, നിക്ഷേപങ്ങളുടെ പേരിലുള്ള തട്ടിപ്പുകൾ എന്നിവയെല്ലാം ഇൻസ്റ്റാഗ്രാം വഴി നടക്കുന്ന തട്ടിപ്പുകളാണ്. ഇവയെ പ്രതിരോധിക്കാനുള്ള ചില മാർഗങ്ങളിതാ..
പലപ്പോഴും ഇൻസ്റ്റഗ്രാം അക്കൗണ്ടുകൾ വഴി വിലകൂടിയ സമ്മാനങ്ങളും പണവും ഗീവ് എവേയായി നൽകാറുണ്ട്. ഇത്തരത്തിൽ വിലകൂടിയ സമ്മാനങ്ങളോ വലിയ തുകകളോ നൽകുമെന്ന് അവകാശപ്പെടുന്ന അക്കൗണ്ടുകൾ ശ്രദ്ധിക്കുക. ബ്രാൻഡിന്റെ ഔദ്യോഗിക പേജിലൂടെ മത്സരം പരിശോധിച്ചുറപ്പിക്കുക, നിങ്ങളുടെ സാമ്പത്തിക വിവരങ്ങളോ ലോഗിൻ വിവരങ്ങളോ ഒരിക്കലും ഇവരുമായി പങ്കിടരുത്.
സെലിബ്രിറ്റികളെയോ ഇൻഫ്ളുവൻസേസിന്റെയോ പേരിൽ ആൾമാറാട്ട തട്ടിപ്പുകൾ നടക്കുന്നുണ്ട്. തട്ടിപ്പുകാർ വ്യാജ അക്കൗണ്ടുകൾ ക്രിയേറ്റ് ചെയ്യും. അത്തരത്തിലുള്ള അക്കൗണ്ടുകളിൽ നിന്നും സന്ദേശങ്ങൾ വന്നാൽ തീർച്ചയായും ശ്രദ്ധിക്കണം. അപരിചിതമായ അക്കൗണ്ടുകളിൽ നിന്നുള്ള സന്ദേശങ്ങളിൽ ജാഗ്രത പാലിക്കണം.
കമന്റുകളിലോ അടിക്കുറിപ്പുകളിലോ നേരിട്ടുള്ള സന്ദേശങ്ങളിലോ ഉള്ള ലിങ്കുകൾ സൂക്ഷിക്കുക. സംശയാസ്പദമായ ലിങ്കുകളിൽ ക്ലിക്കു ചെയ്യരുത്, അവ വ്യാജമാണെന്ന് തോന്നിയെന്ന് വരില്ല. ആവശ്യപ്പെടാത്ത നിക്ഷേപ ഉപദേശങ്ങൾ അല്ലെങ്കിൽ പെട്ടെന്നുള്ള വരുമാനത്തിന്റെ വാഗ്ദാനങ്ങൾ എന്നിവയിൽ ജാഗ്രത പാലിക്കുക. അവയെ കുറിച്ച് കൂടുതൽ അന്വേഷണം നടത്തുക.
തട്ടിപ്പുകളിൽ നിന്നും സുരക്ഷാ പ്രശ്നങ്ങളിൽ നിന്നും പ്രതിരോധം തീർക്കാനുള്ള ചില മാർഗങ്ങൾ ഇൻസ്റ്റഗ്രാമിൽ തന്നെയുണ്ട്. ടു-ഫാക്റ്റർ ഓതന്റിക്കേഷനാണ് അതിൽ ഒന്ന്. ഇത് ഇൻസ്റ്റഗ്രാം അക്കൗണ്ടിലേക്ക് ഒരു അധിക സുരക്ഷാ പാളി ചേർക്കുന്നു. കൂടാതെ നിങ്ങൾ ഒരു തട്ടിപ്പിന് ഇരയാവുകയാണെങ്കിൽ അത് ഉടൻ തന്നെ ഇൻസ്റ്റാഗ്രാമിൽ റിപ്പോർട്ട് ചെയ്യുക.
നിങ്ങളുടെ പാസ്വേഡോ ക്രെഡിറ്റ് കാർഡ് വിശദാംശങ്ങളോ മറ്റു വിവരങ്ങളോ ഇൻസ്റ്റഗ്രാമിൽ പങ്കുവെക്കരുത്. നിങ്ങളുടെ ഇൻസ്റ്റാഗ്രാം ആപ്പും ഫോണും ഏറ്റവും പുതിയ സുരക്ഷാ ഫീച്ചറുകൾ ഉപയോഗിച്ച് അപ്ഡേറ്റ് ചെയ്തിട്ടുണ്ടെന്ന് ഉറപ്പാക്കുക. ഇൻസ്റ്റാഗ്രാം അക്കൗണ്ടിനായി പാസ്വേഡുകൾ സൃഷ്ടിക്കുക, ഒന്നിലധികം അക്കൗണ്ടുകൾക്കായി ഒരേ പാസ്വേഡ് ഉപയോഗിക്കുന്നത് ഒഴിവാക്കുക.
