മുബൈ: ‘സ്വതന്ത്ര വീർ സവർക്കർ മുക്തി ശതാബ്ദി യാത്ര’ ഫ്ളാഗോഫ് ചെയ്ത് ബോളിവുഡ് താരം രൺദീപ് ഹൂഡ. രത്നഗിരി ജയിലിൽ നിന്നും സവർക്കർ മോചിതനായതിന്റെ 100-ാം വാർഷികത്തോട് അനുബന്ധിച്ചാണ് പൂനെയിൽ സ്വതന്ത്ര വീർ സവർക്കർ മുക്തി ശതാബ്ദി യാത്ര സംഘടിപ്പിച്ചത്. (1924 ജനുവരി 6 ന് മഹാരാഷ്ട്രയിലെ രത്നഗിരി ജയിലിൽ നിന്ന് സവർക്കർ മോചിതനാവുകയും പിന്നീട് വീട്ടുതടങ്കലിൽ പാർപ്പിക്കുകയും ചെയ്തിരുന്നു.) തുടർന്ന് പദയാത്രയിലും താരം പങ്കെടുത്തു. സവർക്കറുടെ പ്രതിമ കൈകളിലേന്തിയാണ് നടൻ യാത്രയിൽ പങ്കെടുത്തത്.
‘ ആളുകൾ വളരെ കുറച്ച് മാത്രം മനസ്സിലാക്കിയിട്ടുള്ള ഒരു സ്വാതന്ത്ര്യ സമര സേനാനിയ്ക്ക് വേണ്ടി പ്രവർത്തിക്കാൻ കഴിഞ്ഞതിലും അദ്ദേഹത്തിനെ കുറിച്ച് കൂടുതൽ കാര്യങ്ങൾ ജനങ്ങളിൽ എത്തിക്കാൻ കഴിഞ്ഞതിലും എനിക്ക് സന്തോഷമുണ്ട്. എന്റെ ഏറ്റവും പുതിയ ചിത്രമായ ‘സ്വതന്ത്ര വീർ സവർക്കർ’ എന്ന ചിത്രത്തിലൂടെ അദ്ദേഹത്തെ കുറിച്ച് കൂടുതൽ കാര്യങ്ങൾ ജനങ്ങളിലേക്ക് എത്തിക്കാൻ സാധിക്കുമെന്ന് ഞാൻ പ്രതീക്ഷിക്കുന്നു. സ്വാതന്ത്ര്യത്തിനായി അദ്ദേഹം നടത്തിയ പോരാട്ടങ്ങളെ കുറിച്ച് നമുക്ക് അറിയാവുന്നതാണ്. എന്നാൽ അദ്ദേഹത്തെ കുറിച്ച് ചില തെറ്റായ ധാരണകൾ ഇന്നും നിലനിൽക്കുന്നുണ്ട്. ഈ ധാരണകൾ സിനിമ പുറത്ത് വരുന്നതോടെ മാറുമെന്നും രൺദീപ് ഹൂഡ പറഞ്ഞു.’
സ്വതന്ത്ര വീർ സവർക്കർ സിനിമയുടെ ചിത്രീകരണം മഹാരാഷ്ട്ര, ലണ്ടൻ എന്നിവിടങ്ങളിൽ പുരോഗമിക്കുകയാണ്. ഉത്കർഷ് നൈതാനി തിരക്കഥ നിർവഹിക്കുന്ന ചിത്രം രൺദീപ് ഹൂഡ തന്നെയാണ് സംവിധാനം ചെയ്യുന്നത്. ചിത്രത്തിന്റെ സഹ നിർമ്മാതാവ് കൂടിയാണ് താരം. ആനന്ദ് പണ്ഡിറ്റ്, സന്ദീപ് സിംഗ്, സാം ഖാൻ എന്നിവരാണ് ചിത്രത്തിന്റെ മറ്റ് നിർമ്മാതാക്കൾ. സിനിമ ഈ വർഷം തീയേറ്ററുകളിലെത്തും.
