ന്യൂഡൽഹി: ജനുവരി 8ന് ന്യൂഡൽഹി വിഗ്യാൻ ഭവനിൽ നടക്കുന്ന പ്രാഥമിക കാർഷിക വായ്പാ സംഘങ്ങളുടെ മെഗാകോൺക്ലേവിൽ അമിത് ഷാ അദ്ധ്യക്ഷനാകും. നാഷണൽ ഡെവലപ്മെന്റ് കോർപ്പറേഷനുമായി സഹകരിച്ച് സഹകരണ മന്ത്രാലയമാണ് പരിപാടി സംഘടിപ്പിക്കുന്നത്. കൂടുതൽ പ്രാഥമിക വായ്പാ സംഘങ്ങൾക്ക് ജൻ ഔഷധി കേന്ദ്രങ്ങൾ ആരംഭിക്കാനുള്ള അനുമതി നൽകുന്നതിന്റെ ഭാഗമായാണ് കോൺക്ലേവ് സംഘടിപ്പിക്കുന്നത്.
നാഷണൽ ഡെവലപ്മെന്റ് കോർപ്പറേഷൻ സഹകരണമന്ത്രാലയവുമായി ചേർന്ന് നടത്തുന്ന പരിപാടിയിൽ സഹകരണ മന്ത്രാലയത്തിൽ നിന്നുള്ള വിവിധ ഉദ്യോഗസ്ഥരും സഹകരണ സംഘങ്ങളുടെ രജിസ്ട്രാർമാരും പങ്കെടുക്കും.
ഇതുവരെ 4400 അപേക്ഷകളാണ് ലഭിച്ചത്. ഇതിൽ 2300 സഹകരണ സംഘങ്ങൾക്ക് അനുമതി ലഭിക്കുകയും ചെയ്തു.നിലവിൽ 149 ജൻഔഷധി കേന്ദ്രങ്ങൾ പ്രാഥമിക കാർഷിക വായ്പാ സംഘങ്ങളുടെ കീഴിൽ പ്രവർത്തിക്കുന്നുണ്ട്. ജനറിക് മരുന്നുകൾ 50 മുതൽ 90 ശതമാനം വരെ വിലക്കിഴിവിലാണ് ജൻഔഷധി കേന്ദ്രങ്ങൾ വിൽക്കുന്നത്. 2000 ത്തിലധികം ജനറിക് മരുന്നുകളും 300 ലധികം സർജിക്കൽ ഉപകരണങ്ങളും ജൻഔഷധി കേന്ദ്രങ്ങളിലൂടെ ലഭ്യമാകും.
