തിരുവനന്തപുരം: സംസ്ഥാനത്ത് കാബിനറ്റ് പദവിയിലുള്ള 26 രാഷ്ട്രീയ നേതാക്കളുടെ പേഴ്സണൽ സ്റ്റാഫ് അംഗങ്ങളുടെ എണ്ണം 614. ഈ പേഴ്സൺ സ്റ്റാഫ് അംഗങ്ങളിലെ 420 പേരും രാഷ്ട്രീയ നിയമനം വഴി ജോലിയിൽ പ്രവേശിച്ചവരാണ്.
മുഖ്യമന്ത്രി, മന്ത്രിമാർ, പ്രതിപക്ഷ നേതാവ്, ചീഫ് വിപ്പ്, സ്പീക്കർ, ഡെപ്യൂട്ടി സ്പീക്കർ, ഡൽഹിയിലെ സർക്കാരിന്റെ പ്രത്യേക പ്രതിനിധി എന്നിവരാണ് കാബിനറ്റ് റാങ്കിൽ ഉൾപ്പെടുന്നത്. ഇവർ സെക്രട്ടറിയേറ്റിലേയും മറ്റ് സർക്കാർ വകുപ്പുകളിലേയും ജീവനക്കാർക്ക് പുറമെ രാഷ്ട്രീയക്കാർക്കും പേഴ്സണൽ സ്റ്റാഫ് അംഗങ്ങളായി നിയമനം നൽകാറുണ്ട്.
മുഖ്യമന്ത്രിയുടെയും മന്ത്രിമാരുടെയും പേഴ്സണൽ സ്റ്റാഫിൽ പരാമാവധി 25 അംഗങ്ങളാണുള്ളത്. ഡൽഹിയിലെ സർക്കാരിന്റെ പ്രത്യേക പ്രതിനിധി കെവി തോമസിന് നാല് പേഴ്സണൽ സ്റ്റാഫ് അംഗങ്ങളും ഒരു പ്രൈവറ്റ് സെക്രട്ടറിയുമാണുള്ളത്.