നമ്മുടെ ശരീരത്തിന് എന്തെങ്കിലും അസുഖം വന്നാൽ പെട്ടെന്ന് തന്നെ ഡോക്ടറെ കാണിക്കാറുണ്ട്. നമ്മൾ ലക്ഷങ്ങൾ മുടക്കി വാങ്ങുന്ന വാഹനത്തിനും ഇടക്കിടയ്ക്ക് സർവ്വീസ് അത്യാവശ്യമാണ്. എല്ലാവരും കൃത്യമായ കിലോമീറ്ററുകൾ ആകുമ്പോൾ സർവ്വീസ് ചെയ്യാറുണ്ട്. എന്നാൽ, ഇത്തരത്തിൽ സർവ്വീസ് കഴിഞ്ഞ് നമ്മുടെ വാഹനം വാങ്ങുമ്പോൾ ചില കാര്യങ്ങൾ കൃത്യമായും ശ്രദ്ധിക്കണം. അവ എന്തൊക്കെയാണെന്ന് നോക്കാം.
എവിടെയാണോ വാഹനം സർവ്വീസിന് കൊടുക്കുന്നത് അവിടത്തെ നിയമസാധ്യതയും വിശ്വസ്തതയും ഉറപ്പാക്കിയതിന് ശേഷം മാത്രം വാഹനം കൈമാറുക എന്നതാണ് പ്രധാന കാര്യം. വാഹനം സർവ്വീസ് ചെയ്ത് തിരികെ നൽകിയ ഉടൻ നിങ്ങൾ പറഞ്ഞിട്ടുള്ള പ്രശ്നങ്ങൾ എല്ലാം പരിഹരിച്ചോ എന്ന് ഉറപ്പ് വരുത്തുക. അത് പരിശോധിച്ച് നോക്കാനുള്ള പൂർണ ഉത്തരവാദിത്വം നമുക്കുണ്ട്.
വാഹനം സർവ്വീസ് ചെയ്ത് കഴിഞ്ഞാൽ വിശദമായ ബില്ല് നിങ്ങൾക്ക് നൽകും. ബില്ല് വിശദമായി പരിശോധിച്ചതിന് ശേഷം മാത്രം തുക അടയ്ക്കുക. ചിലപ്പോൾ നിങ്ങൾ കബളിക്കപ്പെടാൻ ഇടയുണ്ട്. എഞ്ചിന് ഓയില് മാറ്റുന്നതിനാണ് പണം നൽകുന്നത്. വണ്ടിയുടെ ഏതെങ്കിലും ഭാഗങ്ങള് മാറ്റിയതിന് വില കൂടുതലാണെന്ന് സംശയം തോന്നിയാല് ഓൺലൈനായി അതും പരിശോധിക്കണം.
വാഹനത്തിന് കൃത്യമായി മാറ്റാനുള്ള ഒന്നാണ് എഞ്ചിൻ ഓയിൽ. അതിനാല് വാഹനം സര്വീസ് ചെയ്ത് കഴിഞ്ഞശേഷമുള്ള ഓയിലിന്റെ നിറം പരിശോധിച്ച് അത് മാറ്റിയിട്ടുണ്ടോയെന്ന് ഉറപ്പ് വരുത്തണം. പുതിയ ഓയില് കണ്ടാല് തന്നെ നമുക്ക് മനസ്സിലാകും. അത് നല്ല ലൈറ്റ്വെയിറ്റായും വൃത്തിയുള്ളതുമായുമാണ് കാണപ്പെടുന്നത്.
സർവ്വീസ് കഴിഞ്ഞാലുടൻ ഒന്ന് ഓടിച്ച് നോക്കുന്നത് ഏറെ നല്ലതാണ്. കാരണം നമ്മൾ ചൂണ്ടികാട്ടിയ പ്രശ്നങ്ങൾ എല്ലാം അവർ പരിഹരിച്ചോ എന്ന് ഉറപ്പ് വരുത്താൻ സാധിക്കും.
