യാത്രകളെ ഇഷ്ടപ്പെടാത്തവരായി ആരാണുള്ളതല്ലേ. അവധിക്കാലം ആഘോഷിക്കാനും മറ്റും കുടുംബസമേതം പോകുന്നവരാണ് ഭൂരിഭാഗം പേരും. ബീച്ചുകളിൽ കുട്ടികളുമായി ഉല്ലസിക്കാൻ ചെന്നാൽ ഒരു പക്ഷേ നിയന്ത്രണങ്ങൾ വെല്ലുവിളി സൃഷ്ടിച്ചേക്കാം. എന്നാൽ പ്രതിസന്ധികൾ നൽകാത്ത, കുട്ടികളുമായി ഉല്ലസിക്കാൻ സാധിക്കുന്ന ഇന്ത്യയിലെ മികച്ച ചില ബീച്ചുകളിതാ..
മഹാബലിപുരം ബീച്ച്, തമിഴ്നാട്
സമ്പന്നമായ ചരിത്ര, പൈതൃകങ്ങൾ ഉറങ്ങുന്ന ഇടമാണ് മഹാബലിപുരം. ബംഗാൾ ഉൾക്കടലിന്റെ തീരം മനം കുളിർക്കുന്ന അനുഭവം നൽകും. കരിങ്കൽ ശിൽപങ്ങലും ക്ഷേത്ര സമുച്ചയങ്ങളും മനോഹരമായ കടൽത്തീരവും കഥ പറയുന്ന തീരക്കാഴ്ച സഞ്ചാരികളെ ആകർഷിക്കുന്നു.
ഗണപതിപുലെ ബീച്ച്, മഹാരാഷ്ട്ര
മഹരാഷ്ട്രയിലെ രത്നഗിരിയിലുള്ള ഈ ബീച്ച്, ഏറ്റവും കൂടുതൽ ആളുകൾ സന്ദർശിക്കുന്ന സ്ഥങ്ങളിലൊന്നാണ്. കടൽത്തീരത്ത് സ്ഥിതി ചെയ്യുന്ന 400 വർഷം പഴക്കമുള്ള ഗണേശ ക്ഷേത്രവും പ്രധാന ആകർഷണമാണ്. ഇടതൂർന്ന വനവും മനോഹര സസ്യങ്ങളും ഉള്ള ഇവിടം പ്രകൃതി സ്നേഹികളുടെ പ്രധാനയിടമാണ്.
ഓം ബീച്ച്, കർണാടക
ഭാരതത്തിന്റെ സ്വത്വത്തെ പ്രതിനിധീകരിക്കുന്ന ഓം എന്നതിനെ അടയാളപ്പെടുന്നതിനാലാണ് ഗോകർണയിലെ ഈ ബീച്ചിനെ ഓം ബീച്ച് എന്ന് വിളിക്കുന്നത്. മുകളിൽ നിന്ന് നോക്കുമ്പോൾ ഓം ചിഹ്നത്തോട് സമാനമാണ്. ആരെയും മോഹിപ്പിക്കുന്ന ഭംഗിയാണ് ഈ ബീച്ചിന്റെ പ്രത്യേകത. അറബിക്കടലിന്റെ നീല വെള്ളവും സ്വർണ മണലും പച്ചപ്പും ആകർഷണീയമാണ്. ഹൈന്ദവരുടെ പ്രധാന തീർത്ഥാടന കേന്ദ്രം കൂടിയാണ് ഗോകർണം.
രാധാനഗർ ബീച്ച്, ആൻഡമാൻ & നിക്കോബാർ
ഏഷ്യയിലെ ഏറ്റവും മനോഹരമായ ബീച്ചുകളിലൊന്നായാണ് രാധാനഗർ ബീച്ച് അറിയപ്പെടുന്നത്. വിസ്മയിപ്പിക്കുന്ന സൗന്ദര്യം കാരണം ലോകത്തിലെ ഏറ്റവും മനോഹരമായ ബീച്ചുകളുടെ പട്ടികയിൽ ഏഴാം സ്ഥാനം ഈ ബീച്ചിനാണ്. ഉദയവും അസ്തമയവും കാണാൻ ആയിരക്കണക്കിന് ആളുകളാണ് ഇവിടെ എത്തുന്നത്. സാഹസികത ഇഷ്ടപ്പെടുന്നവർക്കായി വിവിധ സൗകര്യങ്ങളാണ് ഒരുക്കിയിരിക്കുന്നത്.
പാരഡൈസ് ബീച്ച്, പുതുച്ചേരി
പേരു സൂചിപ്പിക്കുന്നത് പോലെ തന്നെ ഒരു പറുദീസായാണ് ഈ ബീച്ച്. മറ്റു ബീച്ചുകളിൽ നിന്നും വ്യത്യസ്തമായുള്ള മൃദുവായ മണൽത്തരികളാണ് ഇവിടുത്തെ പ്രത്യേകത. അതുകൊണ്ടുതന്നെ കടൽവെള്ളത്തിലെ കളികൾക്കും ആസ്വാദനങ്ങൾക്കും ഇവിടം പ്രസിദ്ധമാണ്. നീലകടൽവെള്ളവും സ്വർണ്ണ-വെള്ളി നിറങ്ങളിലുള്ള മണലുകളും ഈ ബീച്ചിനെ പ്രസിദ്ധമാക്കി മാറ്റുന്നു.
