അയ്യനുറങ്ങുന്നത് ഗാനഗന്ധർവന്റെ സ്വരമാധുര്യത്തിൽ

“ഹരിവരാസനം വിശ്വമോഹനം
ഹരിദധീശ്വരം ആരാധ്യപാദുകം
അരിവിമർദ്ദനം നിത്യ നർത്തനം
ഹരിഹരാത്മജം ദേവമാശ്രയേ
ശരണമയ്യപ്പാ സ്വാമി ശരണമയ്യപ്പാ
ശരണമയ്യപ്പാ സ്വാമി ശരണമയ്യപ്പാ”

ആരെയും ഭക്തിയുടെ പരകോടിയിലെത്തിക്കുന്ന വരികളാണിത്. ഗാന​ഗന്ധർവ്വൻ യേശുദാസിന്റെ സ്വരമാധുര്യത്തിലാണ് സാക്ഷാൽ അയ്യപ്പ സ്വാമിയെ ഉറക്കുന്നത്. ഹരിവരാസനം എന്ന സ്തോത്രം കേൾക്കുന്ന ഏതൊരാളെയും ഭക്തിയുടെ പാരാവശ്യത്തിലെത്തിക്കുമെന്നത് തീർച്ച. ഭക്തിസാന്ദ്രമാക്കുന്നതിൽ യേശുദാസിന്റെ ശബ്ദം പരകോടിയിലെത്തുന്നു.

1975-ൽ പുറത്തിറങ്ങിയ ‘സ്വാമി അയ്യപ്പൻ’ എന്ന സിനിമയ്‌ക്ക് വേണ്ടി മധ്യമാവതി രാ​ഗത്തിൽ യേശുദാസ് പാടിയ ​ഗാനമാണ് കാലങ്ങൾക്കിപ്പുറം അയ്യന്റെ ഉറക്കുപ്പാട്ടായി മാറിയത്. ഇതിന് മുൻപ് ശബരിമലയിൽ ഹരിവരാസനം പാടിയിരുന്നത് ഇവിടുത്തെ പൂജാരിമാരാണെന്ന് പറയപ്പെടുന്നു. ‘ഹരിഹരസുധാഷ്ടകം’ എന്ന സംസ്കൃത ഭക്തി​ഗാനത്തിലെ വരികളാണ് സിനിമയ്‌ക്കായി എടുത്തത്.

കുഭംകുടി കുളത്തൂർ അയ്യരും സം​ഗീത സംവിധായകൻ ജി ദേവരാജനും ഒന്നിച്ചതോടെ വരികൾക്ക് താളം ലഭിച്ചു. അങ്ങനെ യേശുദാസിന്റെ ശബ്ദത്തിൽ ലോകം മുഴുവൻ കേൾക്കുന്ന ഉറക്കുപാട്ടിന്റെ പിറവി അവിടെ ആരംഭിച്ചു. സിനിമയിലേതിൽ നിന്ന് ചില മാറ്റങ്ങൾ വരുത്തി ശബരിമലയ്‌ക്കായി യേശുദാസ് വീണ്ടും ഹരിവരാസനം ആലപിച്ചു.