ഗാന്ധിനഗർ: ഭാരതത്തിന്റെ വികസനം ലക്ഷ്യമിട്ട് രണ്ട് ലക്ഷം കോടി രൂപയുടെ നിക്ഷേപ പദ്ധതികൾ പ്രഖ്യാപിച്ച് അദാനി ഗ്രൂപ്പ് ചെയർമാൻ ഗൗതം അദാനി. ലോകത്തെ തന്നെ ഏറ്റവും വലിയ ഗ്രീൻ എനർജി പാർക്കിനാണ് ഗുജറാത്തിൽ അദാനി ഗ്രൂപ്പ് തുടക്കം കുറിച്ചിരിക്കുന്നത്. ഗ്രീൻ എനർജി പാർക്ക് പ്രവർത്തനം ആരംഭിക്കുന്നതോടെ 1 ലക്ഷം ആളുകൾക്കുള്ള തൊഴിലവസരങ്ങൾ പ്രദാനം ചെയ്യുമെന്നും ഗൗതം അദാനി പറഞ്ഞു. മഹാത്മാ മന്ദിരത്തിൽ നടക്കുന്ന വൈബ്രന്റ് ഗുജറാത്ത് ഗ്ലോബൽ ഉച്ചകോടിയെ അഭിസംബോദന ചെയ്യുകയാിരുന്നു അദ്ദേഹം.
30 ജിഗാവാട്ട് ശേഷിയുള്ള ലോകത്തിലെ തന്നെ ഏറ്റവും വലിയ എനർജി പാർക്കാണ് അഹമ്മദാബാദ് ആസ്ഥാനമാക്കി അദാനി ഗ്രൂപ്പ് നിർമ്മിക്കുന്നത്. 25 ചതുരശ്ര കിലോമീറ്റർ വിസ്തൃതിയിൽ അതിവിശാലമായി നിർമ്മിക്കുന്ന ഈ പദ്ധതി ബഹിരാകാശത്ത് നിന്നും ദൃശ്യമാകുന്ന വിധത്തിലാണ് രൂപകൽപ്പന ചെയ്തിരിക്കുന്നത്. ആത്മനിർഭര ഭാരതത്തിനായി പുനരുപയോഗിക്കാൻ സാധിക്കുന്ന ഊർജങ്ങളുടെ നിർമ്മാണമാണ് ലക്ഷ്യമെന്നും ഇതിന്റെ ഭാഗമായി സോളാർ പാനലുകൾ, കാറ്റാടി ടർബൈനുകൾ, ഹൈഡ്രജൻ ഇലക്ട്രോലൈസറുകൾ, ഗ്രീൻ അമോണിയ തുടങ്ങിയവയുടെ ഉത്പാദനം രാജ്യത്തിൽ തന്നെ വിപുലീകരിക്കുമെന്നും ഗൗതം അദാനി പറഞ്ഞു.
