അയോദ്ധ്യ പ്രാണപ്രതിഷ്ഠാ ചടങ്ങിൽ എൻഎസ്എസ് നിലപാടിന് ഐക്യദാർഢ്യവുമായി ബിജെപി സംസ്ഥാന അദ്ധ്യക്ഷൻ കെ. സുരേന്ദ്രൻ. എൻഎസ്എസിന്റേത് വ്യക്തതയുള്ള നിലപാടാണെന്നും ഹിന്ദുസമൂഹത്തിന് ആത്മവിശ്വാസം നൽകുന്നതാണന്നും ഹൈന്ദവ ഐക്യം ശക്തിപ്പെടുത്തുന്നതാണെന്നും അദ്ദേഹം പറഞ്ഞു. സമൂഹമാദ്ധ്യമത്തിൽ പങ്കുവെച്ച പോസ്റ്റിലാണ് അദ്ദേഹത്തിന്റെ വാക്കുകൾ.
അയോദ്ധ്യയിലെ ശ്രീരാമ ക്ഷേത്രത്തിന്റെ പ്രാണപ്രതിഷ്ഠാ ചടങ്ങ് ബഹിഷ്കരിച്ച കോൺഗ്രസിനെ പരോക്ഷമായി വിമർശിച്ച് എൻഎസ്എസ് വാർത്താകുറിപ്പിറക്കി. വിഗ്രഹ പ്രതിഷ്ഠാ ചടങ്ങിനെ രാഷ്ട്രീയം പറഞ്ഞ് ബഹിഷ്കരിക്കുന്നത് ഈശ്വര നിന്ദയാണെന്നും സ്വാർത്ഥ താത്പര്യങ്ങൾക്ക് വേണ്ടിയും രാഷ്ട്രീയ നേട്ടങ്ങൾക്ക് വേണ്ടിയാണ് ചടങ്ങിനെ എതിർക്കുന്നതെന്നും എൻഎസ്എസ് വിമർശിച്ചു. ഏതൊരു ഈശ്വര വിശ്വാസിയുടേയും കടമയാണ് രാമക്ഷേത്രത്തിന്റെ പ്രാണപ്രതിഷ്ഠാ ചടങ്ങിൽ പങ്കെടുക്കുകയെന്നത്. അതിന് ജാതിയോ മതമോ നോക്കേണ്ടതില്ല. തുടക്കം മുതൽ രാമക്ഷേത്രത്തിന്റെ നിർമ്മാണത്തെ പിന്തുണച്ചിട്ടുണ്ടെന്നും എൻഎസ്എസ് പറഞ്ഞു.
