ലോകത്തിലെ ഏറ്റവും ശക്തമായ പാസ്പോർട്ടുകളുടെ പട്ടിക പുറത്തുവിട്ട് ഹെൻലി പാസ്പോർട്ട് സൂചിക. ജർമ്മനി, ഫ്രാൻസ്, ഇറ്റലി, സ്പെയിൻ, ജപ്പാൻ, സിംഗപൂർ തുടങ്ങിയ രാജ്യങ്ങളാണ് പട്ടികയിൽ ഒന്നാം സ്ഥാനത്തുള്ളത്. ഈ രാജ്യങ്ങളിൽ ഏതെങ്കിലും ഒരു രാജ്യത്തിന്റെ പാസ്പോർട്ടുള്ളവർക്ക് 194 രാജ്യങ്ങളിലേക്ക് വിസയില്ലാതെ യാത്ര ചെയ്യാം.
ദക്ഷിണ കൊറിയ, ഫിൻലൻഡ്, സ്വീഡൻ എന്നീ രാജ്യങ്ങൾ പട്ടികയിൽ രണ്ടാം സ്ഥാനവും ഓസ്ട്രിയ, ഡെൻമാർക്ക്, അയർലൻഡ്, നെതർലൻഡ് എന്നീ രാജ്യങ്ങൾ മൂന്നാം സ്ഥാനവും കരസ്ഥമാക്കി. രണ്ടാം സ്ഥാനത്തുള്ള രാജ്യങ്ങളുടെ പാസ്പോർട്ടുള്ളവർക്ക് 193 രാജ്യങ്ങളിലേക്കും മൂന്നാം സ്ഥാനത്തുള്ള രാജ്യങ്ങളുടെ പാസ്പോർട്ടുള്ളവർക്ക് 192 രാജ്യങ്ങളിലേക്കും വിസയില്ലാതെ സഞ്ചരിക്കാം. പട്ടികയിൽ നാലാം സ്ഥാനത്താണ് ബ്രിട്ടൺ. 191 രാജ്യങ്ങളിലേക്ക് വിസയില്ലാതെ ബ്രിട്ടണിന്റെ പാസ്പോർട്ടുള്ളവർക്ക് യാത്ര ചെയ്യാം. 80 സ്ഥാനത്താണ് പട്ടികയിൽ ഇന്ത്യയുടെ സ്ഥാനം. ഇന്ത്യയുടെ പാസ്പോർട്ട് ഉപയോഗിച്ച് ഇന്തോനേഷ്യ, മലേഷ്യ, വിയറ്റ്നാം, ശ്രീലങ്ക ഉൾപ്പെടെയുള്ള 62 രാജ്യങ്ങളിലേക്ക് വിസയില്ലാതെ സഞ്ചരിക്കാൻ സാധിക്കും.
ഏറ്റവും ദുർബലമായ പാസ്പോർട്ടുകളുടെ കൂട്ടത്തിലാണ് പാകിസ്താനും അഫ്ഗാനിസ്ഥാനും. ദുർബലമായ പാസ്പോർട്ടുകളുടെ പട്ടികയിൽ ഒന്നാം സ്ഥാനമാണ് അഫ്ഗാനിസ്ഥാനുള്ളത്. നാലാം സ്ഥാനത്താണ് പാകിസ്താൻ. ഇതിനുപുറമെ സിറിയയും ഇറാഖും പട്ടികയിൽ സ്ഥാനം പിടിച്ചിട്ടുണ്ട്.
