ബഹിരാകാശത്തെ അത്ഭുതങ്ങൾ മനുഷ്യന് കാണിച്ച് തരുന്ന ജാലകമാണ് വാസ്തവത്തിൽ നാസ. ഭൂമിയിലെയും ബഹിരാകാശത്തേയും മാസ്മരിക ചിത്രങ്ങൾ കാണിച്ച് തരുന്ന പേജാണ് അവരുടേത്. അടുത്തിടെയായി അത്തരത്തിലൊരു കണ്ണഞ്ചിപ്പിക്കുന്ന ചിത്രം നാസ പുറത്തുവിട്ടിരുന്നു. ‘V838 Monocreotis’ എന്ന വിദൂര നക്ഷത്രത്തിന് ചുറ്റും വികസിക്കുന്ന പ്രകാശവലയത്തിന്റെ ചിത്രമാണ് പങ്കുവെച്ചിരിക്കുന്നത്.
ഭൂമിയിൽ നിന്ന് ഏകദേശം 20,000 പ്രകാശവർഷം അകലെയുള്ള ക്ഷീരപഥ ഗാലക്സിയുടെ പുറത്തേ അറ്റത്താണെന്ന് വി838 മോൺ സ്ഥിതി ചെയ്യുന്നതെന്ന് നാസ ചിത്രം പങ്കുവച്ച് കൊണ്ട് പറഞ്ഞിട്ടുണ്ട്. ഇതുവരെ കണ്ടിട്ടില്ലാത്ത തരത്തിലുള്ള പ്രകാശവലയമാണ് നക്ഷത്രത്തിന് ചുറ്റും കാണപ്പെട്ടത്. പൊടിപടലങ്ങൾ കൂടിച്ചേർന്നാണ് ഇത് രൂപപ്പെട്ടതെന്ന് നാസ അറിയിച്ചു.
ചുവന്ന നക്ഷത്രത്തിൽ നിന്ന് പുറന്തളപ്പെടുന്ന പൊടിയും വാതകവും ചേർന്ന് ഭീമകാരമായ ചുഴലിക്കാറ്റുകൾക്ക് കാരണമാകുന്നു. ലൈറ്റ് എക്കോ എന്നാണ് ഇതറിയപ്പെടുന്നത്. ഈ പ്രതിഭാസം സംഭവിക്കുമ്പോൾ നക്ഷത്രങ്ങൾ സൂര്യനേക്കാൾ ആറ് ലക്ഷം മടങ്ങ് ശോഭിക്കും. പ്രകാശത്തിന്റെ വേഗതയിൽ നക്ഷത്രം ചലിക്കുന്നതായി ജ്യോതിശാസ്ത്രജ്ഞർ നിരീക്ഷിച്ചതായി നാസ വിശദീകരിക്കുന്നു. പോസ്റ്റ് പങ്കിട്ട് മണിക്കൂറുകൾക്കകം ലക്ഷക്കണക്കിന് ആളുകളാണ് മനോഹര ചിത്രം കണ്ടത്.
