തിരുവനന്തപുരം: വർക്കലയിൽ വിദേശിയെ തൂങ്ങിമരിച്ച നിലയിൽ കണ്ടെത്തി. കാപ്പിൽ ബീച്ചിന് സമീപത്തുള്ള കായൽ തീരത്താണ് വിദേശിയെ മരിച്ച നിലയിൽ കണ്ടെത്തിയത്. വൈകിട്ട് 5:30 ഓടെ കായലിന് സമീപത്തുള്ള കാറ്റാടി മരത്തിൽ പ്ലാസ്റ്റിക് കയർ ഉപയോഗിച്ച് തൂങ്ങിമരിച്ച നിലയിൽ കണ്ടെത്തുകയായിരുന്നു.
സ്ഥലത്തെത്തിയ സഞ്ചാരികളാണ് മൃതദേഹം ആദ്യം കണ്ടത്. തുടർന്ന് പോലീസിൽ വിവരമറിയിക്കുകയായിരുന്നു. ആളിനെ ഇതുവരെ തിരിച്ചറിയാൻ കഴിഞ്ഞിട്ടില്ല. മരിച്ചയാൾക്ക് ഉദ്ദേശം 50 വയസ് പ്രായമുണ്ടാകുമെന്നും പോലീസ് പറഞ്ഞു. അയിരൂർ പോലീസ് സ്ഥലത്തെത്തി നിയമ നടപടിക്രമങ്ങൾ ആരംഭിച്ചു. മൃതദേഹം മോർച്ചറിയിലേയ്ക്ക് മാറ്റും.
