ഭഗവാൻ ശ്രീരാമൻ ജന്മഭൂമിയിൽ ആഗതനാകുന്ന മുഹൂർത്തത്തിനായി അയോദ്ധ്യയും ഭാരതവും പ്രാർത്ഥനാപൂർവം കാത്തിരിക്കുകയാണ്. അന്ന് ദീപാവലിയായാണ് അയോദ്ധ്യ കൊണ്ടാടുന്നത്. അന്ന് ഭവനങ്ങളിൽ വിളക്കുകൾ തെളിയിച്ച് ശ്രീരാമ പട്ടാഭിഷേകം ആഘോഷിക്കാനുള്ള തയ്യാറെടുപ്പിലാണ് ഓരോരുത്തരും.
മലയാളത്തിന്റെ വാനമ്പാടി കെ എസ് ചിത്ര അയോദ്ധ്യയിൽ പൂജിച്ച അക്ഷതം കഴിഞ്ഞ ദിവസം ഏറ്റുവാങ്ങിയിരുന്നു. ഇതിന് പിന്നാലെ അയോദ്ധ്യയിലെ പ്രതിഷ്ഠ ദിനത്തിൽ ശ്രീരാമ മന്ത്രം ജപിച്ച് വീടുകളിൽ വിളിക്ക് തെളിക്കാൻ അഭ്യർത്ഥിക്കുകയാണ് ഗായിക. വീഡിയോ സന്ദേശത്തിലൂടെയാണ് ജനുവരി 22 ന് ‘ശ്രീരാമ ജയരാമ ജയജയരാമ’ എന്ന രാമമന്ത്രം ജപിച്ചു കൊണ്ടിരിക്കാൻ ചിത്ര എല്ലാവരോടും അഭ്യർത്ഥിച്ചത്. ഭഗവാന്റെ അനുഗ്രഹം എല്ലാവർക്കും ഉണ്ടാകട്ടെ എന്ന് പ്രാർത്ഥിക്കുന്നതായും പ്രിയ ഗായിക പറഞ്ഞു.
“അയോദ്ധ്യയിൽ പ്രതിഷ്ഠ ദിനം ജനുവരി 22ന് നടക്കുമ്പോൾ ഉച്ചയ്ക്ക് 12.20ന് ശ്രീരാമ ജയരാമ ജയജയരാമ എന്ന രാമമന്ത്രം ജപിച്ചു കൊണ്ടിരിക്കണമെല്ലാരും. അതുപോലെ വൈകുന്നേരം അഞ്ച് തിരിയുള്ള വിളക്ക് വീടിന്റെ നാനഭാഗത്തും തെളിയിക്കണം. ഭഗവാന്റെ അനുഗ്രഹം എല്ലാവർക്കും ഉണ്ടാകട്ടെ എന്ന് പ്രാർത്ഥിക്കുന്നു. ലോകാസമസ്താ സുഖിനോ ഭവന്തു” ചിത്ര വീഡിയോ സന്ദേശത്തിൽ പറഞ്ഞു.
