ചാർജ് ചെയ്യേണ്ട, മറ്റ് മെയിന്റനൻസ് ഒന്നും തന്നെ ആവശ്യമില്ല.. ഈ ബാറ്ററി കാലങ്ങളോളം നിലനിൽക്കും.. 50 വർഷം ആയുസുള്ള സവിശേഷമായ ബാറ്ററി നിർമ്മിച്ചിരിക്കുന്നത് ചൈനയിൽ നിന്നുള്ള ഒരു സ്റ്റാർട്ട്-അപ്പ് കമ്പനിയാണ്. ബെയ്ജിംഗ് ആസ്ഥാനമായി പ്രവർത്തിക്കുന്ന ബെറ്റവോൾട്ട് എന്ന കമ്പനി 50 വർഷം വൈദ്യുതി പ്രവഹിപ്പിക്കുന്ന ന്യൂക്ലിയർ ബാറ്ററിയാണ് നിർമ്മിച്ചിരിക്കുന്നത്.
ഒരു നാണയത്തിന്റെ വലിപ്പത്തേക്കാൾ ചെറുതാണ് ഈ ബാറ്ററി. ആറ്റോമിക് എനർജിയെ ചെറിയരൂപത്തിലാക്കി ഉപയോഗിച്ച ലോകത്തിലെ ആദ്യ ബാറ്ററിയാണിതെന്നും കമ്പനി അവകാശപ്പെടുന്നു. ബാറ്ററിയുടെ പരീക്ഷണങ്ങൾ പൂർത്തിയായെന്നും ഉടൻ വിപണിയിലെത്തുമെന്നുമാണ് സൂചന. ഡ്രോണുകളും ഫോണുകളും വിപണിയിൽ ലഭ്യമാകുന്നത് പോലെ ഈ ന്യൂക്ലിയർ ബാറ്ററിയും ഇനി വാങ്ങാൻ കഴിയുമെന്ന് കമ്പനി പറയുന്നു.
ലോംഗ്-ലാസ്റ്റിംഗ് പവർ സപ്ലൈ വാഗ്ദാനം ചെയ്യുന്ന ബാറ്ററി വിവിധ ആവശ്യങ്ങൾക്കായി ഉപയോഗിക്കാവുന്നതാണ്. എയ്റോസ്പേസ്, എഐ ഉപകരണം, മെഡിക്കൽ ഉപകരണങ്ങൾ, മൈക്രോ പ്രോസസറുകൾ, സെൻസറുകൾ, ഡ്രോണുകൾ, മൈക്രോ-റോബോട്ടുകൾ എന്നിവയിൽ ഈ ബാറ്ററി ഉപയോഗിക്കാം. ന്യൂക്ലിയർ ഐസോടോപ്പുകളും ഡയമണ്ട് സെമികണ്ടക്ടറുകളും ഉപയോഗിച്ചുള്ള നേരിയ ലെയറുകളാണ് ബാറ്ററിക്ക് പുറത്തുള്ളത്. മൂന്ന് വോൾട്ടിൽ 100 മൈക്രോവാട്ട് വൈദ്യുതി ഉത്പാദിപ്പിക്കാൻ ബാറ്ററിക്ക് കഴിയും. 2025 ആകുമ്പോഴേക്കും 1 വാട്ട് വൈദ്യുതി ഉത്പാദിപ്പിക്കുന്ന തരത്തിലേക്ക് ബാറ്ററിയെ സജ്ജമാക്കുമെന്നും കമ്പനി അറിയിച്ചു.
മനുഷ്യശരീരത്തിന് ഹാനികരമാവും വിധത്തിലുള്ള റേഡിയേഷൻ ഇതിനുണ്ടാകുന്നില്ലെന്നും പേസ്മേക്കർ അടക്കമുള്ള വൈദ്യുത ഡിവൈസുകളിൽ ബാറ്ററി ഉപയോഗിക്കാമെന്നുമാണ് കമ്പനിയുടെ വാഗ്ദാനം. -60 ഡിഗ്രി മുതൽ 120 ഡിഗ്രി വരെ താപനിലയിൽ ബാറ്ററി പ്രവർത്തനക്ഷമമാകും. ഇവ പരിസ്ഥിതി സൗഹാർദ്ദ ബാറ്ററിയാണെന്നും കമ്പനി അവകാശപ്പെടുന്നു. ബാറ്ററിയുടെ ആയുസ് അവസാനിച്ചാൽ അവയിലെ 63 ഐസോട്ടോപ്പുകളും കോപ്പറിലുള്ള ഐസോടോപ്പുകളായി മാറും. ഇവ റേഡിയോ-ആക്ടീവ് അല്ലാത്തതിനാൽ വായുവിനോ മണ്ണിനോ മലീനീകരണം ഉണ്ടാക്കുകയില്ല.
