ലക്നൗ: അയോദ്ധ്യയിൽ ഇലക്ട്രിക് പിങ്ക് ഓട്ടോ സർവീസ് ആരംഭിച്ചതിൽ ഉത്തർപ്രദേശ് സർക്കാരിനും മുഖ്യമന്ത്രി യോഗി ആദിത്യനാഥിനും നന്ദി അറിയിച്ച് ശ്രീരാമജന്മഭൂമി തീർത്ഥക്ഷേത്ര ജനറൽ സെക്രട്ടറി ചമ്പത് റായ്. നഗരത്തിലെ മലിനീകരണം കുറയ്ക്കുകയെന്നതിലുപരി സ്ത്രീശാക്തീകരണം കൂടി ലക്ഷ്യം വച്ചാണ് ഉത്തർപ്രദേശ് സർക്കാർ പിങ്ക് ഓട്ടോ സർവീസിന് തുടക്കം കുറിച്ചിരിക്കുന്നതെന്നും ചമ്പത് റായ് പറഞ്ഞു.
” മലിനമുക്ത ഉത്തർപ്രദേശ് എന്ന ലക്ഷ്യത്തിലേക്ക് അടുത്തുകൊണ്ടിരിക്കുകയാണ്. ഉത്തർപ്രദേശ് സർക്കാർ തുടക്കം കുറിച്ച ഇലക്ട്രിക് ഓട്ടോ സർവീസ് ജനങ്ങൾക്കു വേണ്ടിയുള്ളതാണ്. ഇത് അയോദ്ധ്യയിലേക്ക് വരുന്ന ഭക്തർക്ക് കൂടുതൽ ഗുണം ചെയ്യും”- ചമ്പത് റായ് അറിയിച്ചു.
അയോദ്ധ്യ സന്ദർശിക്കാൻ എത്തുന്ന ഭക്തരെ സഹായിക്കാനായാണ് സർക്കാർ പുതിയ ഇലക്ട്രിക് ഓട്ടോ സർവീസുകൾക്ക് തുടക്കം കുറിച്ചത്. വെള്ള, പിങ്ക് എന്നീ രണ്ട് തരം ഇലക്ട്രിക് ഓട്ടോകളാണ് നഗരത്തിൽ തുടങ്ങിയിരിക്കുന്നതെന്ന് പദ്ധതിയുടെ സൂപ്പർവൈസർ പറഞ്ഞു. വെള്ള നിറത്തിലുള്ള ഓട്ടോകൾ പുരുഷന്മാരാണ് ഓടിക്കുന്നത്. സ്ത്രീശാക്തീകരണം മുന്നിൽ കണ്ടാണ് പിങ്ക് ഓട്ടോ സർവീസുകൾക്ക് സർക്കാർ അനുമതി നൽകിയത്.