അമരാവതി: പ്രാണപ്രതിഷ്ഠാ ചടങ്ങിന് ഏതാനും ദിവസങ്ങൾ ബാക്കി നിൽക്കെ രാജ്യം ശ്രീരാമചന്ദ്രനിൽ അലിഞ്ഞിരിക്കുകയാണെന്ന് പ്രധാനമന്ത്രി നരേന്ദ്രമോദി. ശ്രീരാമചന്ദ്രന്റെ ജീവിതം സദ്ഭരണത്തിന്റെ പ്രതീകമാണെന്നും പ്രചോദനം നൽകുന്നതാണെന്നും പ്രധാനമന്ത്രി അറിയിച്ചു. നാഷണൽ അക്കാദമി ഓഫ് കസ്റ്റംസ്, ഇൻഡയ്റക്ട് ടാക്സ് ആൻഡ് നർക്കോട്ടിക്സിന്റെ ( NACIN) പുതിയ ക്യാമ്പസ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
” ഭാരതത്തിന്റെ വികസനത്തിൽ NACIN ക്യാമ്പസിന് പ്രധാന പങ്ക് വഹിക്കാൻ സാധിക്കും. സങ്കീർണമായ ഒരു നികുതി സമ്പ്രദായമായിരുന്നു മുമ്പ് ഇന്ത്യയ്ക്കുണ്ടായിരുന്നത്. അതിൽ നിന്നെല്ലാം മാറ്റങ്ങൾ കൊണ്ട് വന്ന് സുതാര്യത ഉറപ്പുവരുത്തിയത് ജിഎസ്ടി പ്രാബല്യത്തിൽ വന്നതിനു ശേഷമാണ്. ജനങ്ങളിൽ നിന്നും പിരിച്ചെടുക്കുന്ന നികുതി പണം സാമൂഹിക ക്ഷേമത്തിനായി ഉപയോഗപ്പെടുത്തണം. ശ്രീരാമന്റെ ജീവിതം നമ്മെ നേരായ പാതയിലൂടെ നടത്തുന്നു. രാമന്റെ ജീവിതം സദ്ഭരണത്തിന്റെ പ്രതീകമാണ്. അദ്ദേഹത്തിന്റെ ജീവിതം നിങ്ങളുടെ ക്യാമ്പസിന് പ്രചോദനം നൽകും. ” – പ്രധാനമന്ത്രി പറഞ്ഞു.
ഇന്ന് രാവിലെയായിരുന്നു രണ്ട് ദിവസം നീണ്ടു നിൽക്കുന്ന ദക്ഷിണേന്ത്യൻ പര്യടനം പ്രധാനമന്ത്രി ആരംഭിച്ചത്. ആന്ധ്രാപ്രദേശിലെത്തിയ പ്രധാനമന്ത്രി ലോപാക്ഷി ക്ഷേത്രത്തിലും സന്ദർശനം നടത്തിയിരുന്നു.