വാഹനത്തിന്റെ എഞ്ചിൻ ഓഫാക്കാതെ പുറത്തിറങ്ങുന്നവർക്ക് പിഴ ചുമത്താനൊരുങ്ങി അബുദാബി പോലീസ്. ആദ്യഘട്ടത്തിൽ ഡ്രൈവർമാർക്ക് മുന്നറിയിപ്പ് നൽകി. 500 ദർഹമാണ് (11,318 രൂപ) പിഴ ചുമത്തുന്നത്. ഡ്രൈവർമാർ എഞ്ചിൻ ഓഫാക്കാതെ വാഹനത്തിൽ നിന്നിറങ്ങി വീട്ടുസാധനങ്ങൾ വാങ്ങുന്നതും എടിഎമ്മിൽ കയറുന്നതും പെട്രോൾ പമ്പിൽ കയറുന്നതും പതിവായതോടെയാണ് പോലീസ് നടപടി കടുപ്പിച്ചത്.
കൂടാതെ കുട്ടികളെ തനിച്ചിരുത്തിയാകും മാതാപിതാക്കൾ ഇത്തരം സാഹസത്തിന് മുതിരുന്നതെന്നും പോലീസിന്റെ ശ്രദ്ധയിൽപ്പെട്ടിട്ടുണ്ട്. എ.സി ഓണാക്കി കുട്ടികളെ കാറിൽ തനിച്ചിരുത്തി മണിക്കൂറുകളോളമാണ് ചിലർ ഷോപ്പിംഗിനായി വിനിയോഗിക്കുന്നത്. ഇങ്ങനെ അലക്ഷ്യമായി പോകുന്നത് വാഹനം മോഷ്ടിക്കപ്പെടാനുള്ള സാദ്ധ്യത വർദ്ധിപ്പിക്കുന്നതായും പോലീസ് വ്യക്തമാക്കുന്നു. ഇന്നു മുതലാണ് മുന്നറിയിപ്പ് നൽകി തുടങ്ങിയത്.
