ശ്രീരാമചന്ദ്രനെ തിരികെ അയോദ്ധ്യയുടെ മണ്ണിലേക്ക് വരവേൽക്കാനുള്ള തയ്യാറെടുപ്പിലാണ് ഭാരതം. സമീപ കാലങ്ങളിൽ നടന്നതിനെക്കാൾ ചരിത്രപ്രധാന്യം വഹിക്കുന്ന ഒരു മൂഹൂർത്തത്തിനായി രാജ്യം സാക്ഷ്യം വഹിക്കാൻ ഒരുങ്ങുമ്പോൾ ഇന്ത്യാ മഹാരാജ്യത്തിൽ ജയ് ശ്രീ റാം വിളികളാണ് അലയടിക്കുന്നത്. ജനുവരി 22-ാം തീയതി പ്രൗഢ ഗംഭീരമായി നടക്കുന്ന പ്രാണ പ്രതിഷ്ഠാ ചടങ്ങുകൾ ഉച്ചയോടെയാണ് ആരംഭിക്കുന്നത്. പ്രാണ പ്രതിഷ്ഠാ ചടങ്ങുകൾക്ക് ശേഷം ജനുവരി 23-ാം തീയതി ക്ഷേത്രം തുറക്കുമ്പോൾ ഭക്തർക്കായുള്ള പ്രധാന ആരതികൾ എന്തൊക്കെയാണെന്നും ആരതികൾക്കായുള്ള പാസുകൾ എങ്ങനെ ബുക്ക് ചെയ്യാമെന്നും നോക്കാം..
ദിവസവും മൂന്ന് ആരതികളായിരിക്കും ക്ഷേത്രത്തിൽ പ്രധാനമായും നടത്തുക. രാവിലെ 6.30-ന് ശൃംഗാർ ആരതിയും, ഉച്ച 12 മണിയോടെ ഭോഗ് ആരതിയും നടത്തും. രാത്രി 7.30-ഓടെയായിരിക്കും സന്ധ്യാ ആരതി നടത്തുക. ആരതി പാസുകളുമായി എത്തുന്നവർക്ക് മാത്രമായിരിക്കും ഇതിൽ പങ്കെടുക്കാൻ സാധിക്കുക.
ആരതികൾ എങ്ങനെ ബുക്ക് ചെയ്യാം..
1. ശ്രീരാമ ജന്മഭൂമി തീർത്ഥ ക്ഷേത്രട്രസ്റ്റിന്റെ ഔദ്യോഗിക വെബ്സൈറ്റായ srjbtkshetra.org സന്ദർശിക്കുക.
2. ഇതിൽ മൊബൈൽ നമ്പർ നൽകിയ ശേഷം ഒടിപി ഉപയോഗിച്ച് ലോഗിൻ ചെയ്യാം.
3. പിന്നീട് തുറന്നു വരുന്ന ഹോം പേജിൽ ആരതി സെക്ഷൻ തിരഞ്ഞെടുക്കുക.
4. ഇവിടെ നിങ്ങൾക്ക് ആവശ്യമുള്ള തീയതി പ്രകാരം ചെയ്യാൻ ഉദ്ദേശിക്കുന്ന ആരതികൾ സെലക്ട് ചെയ്യാവുന്നതാണ്.
5. പിന്നീട് വരുന്ന സെക്ഷനിൽ പേര്, മേൽവിലാസം, ഫോട്ടോ, മൊബൈൽ നമ്പർ എന്നിവ ചേർത്ത് രജിസ്റ്റർ ചെയ്തിടുക.
6. ക്ഷേത്ര ദർശനത്തിനായി എത്തുന്ന സമയത്ത് കൗണ്ടറിൽ നിന്നും പാസ് വാങ്ങി നിങ്ങൾക്ക് ആരതികളിൽ പങ്കെടുക്കാം. ഈ സമയത്ത് ലൈസൻസ്, ആധാർ, വോട്ടർ ഐഡി ഇവയിൽ ഏതെങ്കിലും ഒരു രേഖ കയ്യിൽ കരുതേണ്ടതുണ്ട്.
