ടെക്സാസ്: കനേഡിയൻ പോൾ വാൾട്ട് ചാമ്പ്യൻ ഷോൺ ബാർബർ (29) അന്തരിച്ചു. ആരോഗ്യ പ്രശ്‌നങ്ങളെ തുടർന്ന് ടെക്സാസിലെ കിംഗ്വുഡിലുള്ള വസതിയിൽ വച്ചായിരുന്നു അന്ത്യം. ബാർബറുടെ ഏജന്റ് പോൾ ഡോയലാണ് ഇൻസ്റ്റഗ്രാമിലൂടെ മരണവിവരം അറിയിച്ചത്. അസുഖ ബാധിതനായി കുറച്ച് നാൾ ചികിത്സയിലായിരുന്നു.
2016 ജനുവരിയിൽ പുരുഷന്മാരുടെ പോൾവോൾട്ടിൽ ബാർബർ കാനഡയുടെ റെക്കോർഡ് തിരുത്തി. 2015-ൽ ടൊറന്റോ വേദിയായ പാൻ അമേരിക്കൻ ഗെയിംസിൽ സ്വർണ മെഡൽ നേടി. ഇതേ വർഷം ചൈനയിലെ ബീജിംഗിൽ നടന്ന ഐഎഎഎഫ് ലോക ചാമ്പ്യൻഷിപ്പിലും ബാർബർ വിജയിയായിരുന്നു. റീയോ ഡി ജനീറോ വേദിയായ 2016-ലെ ഒളിമ്പിക്‌സിലും താരം ഫൈനലിലെത്തിയിരുന്നു.
പോൾവാൾട്ടിൽ ആറ് മീറ്ററാണ് കരിയറിലെ ഏറ്റവും മികച്ച പ്രകടനം. അത്‌ലറ്റിക്‌സിലെ ഒരു കനേഡിയൻ താരത്തിന്റെ ഏറ്റവും മികച്ച പ്രകടനവും ഇതാണ്.
കോളേജ് വിദ്യാർത്ഥിയായ ബാർബർ യൂണിവേഴ്സിറ്റി ഓഫ് അക്രോണിന്റെ ട്രാക്ക് ആൻഡ് ഫീൽഡ് ടീമിൽ അംഗമായിരുന്നു.
