മുംബൈ: അയോദ്ധ്യയിലെ പ്രാണപ്രതിഷ്ഠാ ചടങ്ങിനോട് അനുബന്ധിച്ച് ജനുവരി 22ന് പൊതു അവധി പ്രഖ്യാപിച്ച് മഹാരാഷ്‌ട്ര സർക്കാർ. സംസ്ഥാന സർക്കാർ പുറപ്പെടുവിച്ച സർക്കുലറിലാണ് ഇക്കാര്യം വ്യക്തമാക്കിയത്. ഉത്തർപ്രദേശ്, ഗോവ, മദ്ധ്യപ്രദേശ് എന്നീ സംസ്ഥാനങ്ങൾ നേരത്തെ തന്നെ പൊതു അവധി പ്രഖ്യാപിച്ചിരുന്നു. ഈ സാഹചര്യത്തിൽ എല്ലാ സ്‌കൂളുകളും, കോളേജുകളും അന്നേദിവസം അവധിയായിരിക്കും.
രാജ്യത്തെ നിരവധി സംസ്ഥാനങ്ങളിലെ സർക്കാർ സ്ഥാപനങ്ങൾക്ക് അന്നേദിവസം ഉച്ചവരെ അവധിയാണ്. ഹരിയാന, ഛത്തീസ്ഗഡ് എന്നീ സംസ്ഥാനങ്ങളിലെ എല്ലാ വിദ്യാഭ്യാസ സ്ഥാപനങ്ങൾക്കും അവധി പ്രഖ്യാപിച്ചിട്ടുണ്ട്. രാജ്യത്തെ പൊതുമേഖലാ ബാങ്കുകൾക്കും ധനകാര്യ സ്ഥാപനങ്ങൾക്കും ജനുവരി 22ന് ഉച്ചവരെ അവധിയായിരിക്കുമെന്ന് കേന്ദ്ര ധനമന്ത്രാലയവും അറിയിച്ചു.
തിങ്കളാഴ്ച നടക്കുന്ന പ്രാണപ്രതിഷ്ഠാ ചടങ്ങിൽ പ്രധാനമന്ത്രി നരേന്ദ്രമോദിയാണ് മുഖ്യാതിഥി. ഏഴായിരത്തോളം വിശിഷ്ട വ്യക്തികളും ചടങ്ങിൽ പങ്കെടുക്കും. രാഷ്‌ട്രീയ, കലാ സാംസ്‌കാരിക, കായിക, സാമൂഹ്യ മേഖലകളിൽ വ്യക്തിമുദ്ര പതിപ്പിച്ച നിരവധി പേർക്ക് പ്രാണപ്രതിഷ്ഠാ ചടങ്ങിനായുള്ള ക്ഷണപത്രിക ലഭിച്ചിട്ടുണ്ട്.
