ന്യൂഡൽഹി: അയോദ്ധ്യയിലെ രാമക്ഷേത്രത്തിലെ പ്രസാദം എന്ന പേരിൽ ഓൺലൈനായി മധുര പലഹാരങ്ങൾ വിറ്റഴിച്ച ആമസോണിന് നോട്ടീസ് അയച്ച് കേന്ദ്രം. തെറ്റിദ്ധരിപ്പിച്ച് വഞ്ചനപരമായ വ്യാപരമാണ് നടത്തുന്നതെന്ന് കണ്ടെത്തിയതിനെ തുടർന്നാണ് ആമസോൺ സെല്ലർ സർവീസസ് ലിമിറ്റഡിന് കേന്ദ്ര ഉപഭോക്തൃ സംരക്ഷണ അതോറിറ്റി (സിസിപിഎ) നോട്ടീസ് അയച്ചത്.
പ്രാണ പ്രതിഷ്ഠ പോലും കഴിയാത്ത ക്ഷേത്രത്തിലെ പ്രസാദമെന്ന പേരിൽ മധുരപലാഹാരങ്ങൾ വിറ്റഴിച്ച് ഉപഭോക്താക്കളെ തെറ്റിദ്ധരിപ്പിക്കുന്നവെന്ന് ചൂണ്ടിക്കാട്ടി കോൺഫെഡറേഷൻ ഓഫ് ഓൾ ഇന്ത്യ ട്രേഡേഴ്സ് (സിഎഐടി) നൽകിയ പരാതിയിലാണ് നടപടി. രഘുപതി നെയ്യ് ലഡു, ഖോയ ഖോബി ലഡു, ഘീ ബുന്ദി ലഡു, ദേശി കൗ മിൽക് പേഡ എന്നിവയാണ് അയോദ്ധ്യ പ്രസാദം എന്ന പേരിൽ വിൽപന നടത്തിയതെന്ന് ഉപഭോക്തൃ സംരക്ഷണ അതോറിറ്റി പറഞ്ഞു. ഉപഭോക്താക്കളെ തെറ്റിദ്ധരിപ്പിച്ച് ഉത്പന്നങ്ങൾ വിൽക്കുന്നത് കുറ്റകരമാണെന്നും ഇത്തരലുള്ള വിൽപന അംഗീകരിക്കാനാൻ കഴിയില്ലെന്നും അതോറിറ്റി വ്യക്തമാക്കി.
സിസിപിഎ നൽകിയ നോട്ടീസിന് മറുപടി നൽകാൻ ആമസോണിന് ഏഴ് ദിവസത്തെ സമയം നൽകിയിട്ടുണ്ട്. അല്ലാത്തപക്ഷം 2019-ലെ ഉപഭോക്തൃ സംരക്ഷണ നിയമത്തിന്റെ വ്യവസ്ഥകൾ പ്രകാരം കമ്പനിക്കെതിരെ ആവശ്യമായ നടപടികൾ ആരംഭിക്കുമെന്ന് കേന്ദ്രം വ്യക്തമാക്കിയിട്ടുണ്ട്.
