അമിതക്ഷീണവും ഉറക്കച്ചടവും വകവയ്ക്കാതെ വാഹനം ഓടിച്ച് അപകടം ക്ഷണിച്ച് വരുത്തുന്നവരാണ് ഇന്ന് അധികവും. മിക്കപ്പോഴും ഇത്തരം കാര്യങ്ങൾ വാഹനമൊടിക്കുന്നവർ കാര്യമാക്കാറില്ല എന്നതാണ് വാസ്തവം. വാഹനം ഓടിക്കുന്നതിനിടയിലെ ചില ലക്ഷണങ്ങളിൽ നിന്ന് ഉറക്കവും അതുസംബന്ധിച്ച പ്രശ്നങ്ങളും തിരിച്ചറിയാമെന്ന് കണ്ടെത്തിയിരിക്കുകയാണ് ഗവേഷകർ.
വാഹനം ഓടിക്കവെ വിൻഡോകൾ താഴ്ത്തി വയ്ക്കുന്നതും ചായയോ കാപ്പിയോ കുടിക്കണമെന്ന് തോന്നുന്നതും ഉച്ചത്തിൽ പാട്ടുവയ്ക്കുന്നതും ഉറക്ക സംബന്ധമായ പ്രശ്നങ്ങളുടെ ലക്ഷണങ്ങളാണെന്ന് ഗവേഷകർ പറയുന്നു. ഒബ്സ്ട്രക്ടീവ് സ്ലീപ് അപ്നീയ എന്ന തകരാർ മൂലമാകാം ഉറക്കച്ചടവ് തടയുന്ന ഒന്നിലധികം മാർഗ്ഗങ്ങൾ തേടുന്നതെന്നാണ് ഇആർജെ ഓപ്പൺ റിസർച്ച് എന്ന ജേണലിൽ പരാമർശിച്ചിരിക്കുന്നത്.
ഒബ്സ്ട്രക്ടീവ് സ്ലീപ് അപ്നിയ ഉള്ളവരിൽ അമിതമായ ഉറക്കച്ചടവ് അനുഭവപ്പെടും. കൂടാതെ ഇത്തരത്തിലുള്ളവർ ഉറക്കെ കൂർക്കം വലിക്കുകയും ഉറക്കത്തിനിടെ ശ്വസനസംബന്ധമായ പ്രശ്നങ്ങൾ നേരിടുകയും ഇടയ്ക്കിടെ ഉണരുകയും ചെയ്യും. അഞ്ചിൽ ഒരാൾ ഇത്തരത്തിൽ ഒരു പ്രശ്നം നേരിടുന്നുവെങ്കിലും മിക്കപ്പോഴും ഇത് തിരിച്ചറിയാറില്ല എന്നതാണ് വാസ്തവം.
