ഭാരതീയർക്ക് റിപ്പബ്ലിക് ദിനാശംസകൾ അറിയിച്ച് ആഫ്രിക്കൻ സ്വദേശിയും സോഷ്യൽ മീഡിയ താരവുമായ കിലി പോൾ. സമൂഹമാദ്ധ്യമമായ ഇൻസ്റ്റഗ്രാമിലൂടെയാണ് അദ്ദേഹം ആശംസകൾ അറിയിച്ചത്. എന്റെ ഭാരതത്തിന് റിപ്പബ്ലിക് ദിനാശംസകൾ എന്നായിരുന്നു കിലി പോളിന്റെ കുറിപ്പ്. ഒപ്പം ത്രിവർണ പതാകയേന്തി ദേശീയ ഗാനം ആലപിക്കുന്നതിന്റെ വീഡിയോയും പങ്കുവച്ചു.
ഇന്ത്യൻ ഗാനങ്ങൾക്കനുസരിച്ചു ചുണ്ടുകൾ ചലിപ്പിച്ചും നൃത്തം ചെയ്തും സമൂഹമാദ്ധ്യമങ്ങളിൽ ദശലക്ഷക്കണക്കിന് ആരാധകരെ നേടിയ താരമാണ് കിലി പോൾ. അയോദ്ധ്യാ രാമക്ഷേത്രത്തിലെ പ്രാണപ്രതിഷ്ഠാ ദിനത്തിലും കിലി പോൾ രാമമന്ത്രം ആലപിച്ചുകൊണ്ടുള്ള ഒരു വീഡിയോ പങ്കുവച്ചിരുന്നു. പ്രാണപ്രതിഷ്ഠാ ചടങ്ങിൽ പങ്കെടുക്കാൻ ആഗ്രഹമുണ്ടായിരുന്നു എന്നും കിലി പോൾ അറിയിച്ചിരുന്നു.
കിലിക്കൊപ്പം സഹോദരി നീമയും വീഡിയോകളിൽ പ്രത്യക്ഷപ്പെടാറുണ്ട്. ടാൻസാനിയയിലെ ഉൾഗ്രാമത്തിലാണ് കിലി പോൾ താമസിക്കുന്നത്. കൃഷിയും പശു വളർത്തലുമാണ് ഇവരുടെ ഉപജീവനമാർഗം. കുട്ടിക്കാലം മുതൽ ഇന്ത്യൻ സിനിമകളുടെ കടുത്ത ആരാധകനായിരുന്നു കിലി. ഇപ്പോൾ 5 മില്യണിലധികം ഫോളോവേഴ്സാണ് കിലി പോളിന് ഇൻസ്റ്റഗ്രാമിലുള്ളത്.
