നെല്ലിക്ക കഴിക്കാൻ ഇഷ്ടമില്ലാത്തവരാണ് പലരും. കയ്പ്പ് തന്നെയാണ് ഇതിന് കാരണം. എന്നാൽ ആരോഗ്യത്തിനേറെ ഗുണങ്ങൾ നൽകുന്നവയാണ് നെല്ലിക്ക. ഇതിലടങ്ങിയിരിക്കുന്ന ആന്റി ഓക്സിഡന്റുകളും മറ്റ് പോഷകങ്ങളും ആരോഗ്യത്തിനേറെ ഗുണങ്ങൾ നൽകുന്നു. കണ്ണിന്റെ ആരോഗ്യത്തിനും ആമാശയത്തിന്റെ പ്രവർത്തനത്തിനും ദഹനപ്രക്രിയയ്ക്കും നെല്ലിക്ക നൽകുന്ന ഗുണങ്ങൾ ചില്ലറയല്ല.
പക്ഷേ കാഞ്ഞിര കയ്പ്പ് എന്ന കാരണത്താൽ പുറത്ത് നിർത്തിയിരിക്കുന്ന നെല്ലിക്കയെ അകത്താക്കാം. കിടിലൻ അച്ചാറിലൂടെയാണ് ഇത്. അത്ര സാധാരണമല്ലാത്ത, എന്നാൽ നാടനായ കരി നെല്ലിക്ക അഥവാ നെല്ലിക്ക കറുപ്പിച്ച അച്ചാർ തയ്യാറാക്കി നോക്കൂ..
കറുത്ത നെല്ലിക്ക ഉണ്ടാക്കാൻ ആവശ്യമായ സാധനങ്ങൾ
മൺകലം
നെല്ലിക്ക- 1 കിലോ
കല്ലുപ്പ്- ആവശ്യത്തിന്
കറിവേപ്പില
വെള്ളം
വാഴയില
തയ്യാറാക്കേണ്ട വിധം
- ചുവടു കട്ടിയുള്ള മൺകലത്തിൽ നല്ലെണ്ണ ഒഴിച്ചുകൊടുക്കുക. തണ്ടോട് കൂടിയ കറിവേപ്പില കലത്തിൽ നിരത്തി കൊടുക്കുക.
- ഇതിലേക്ക് കഴുകി വച്ചിരിക്കുന്ന നെല്ലിക്കയുടെ ഒരു ഭാഗം മാത്രം ചേർക്കുക. നാടൻ നെല്ലിക്കയാണെങ്കിൽ രൂചി കൂടും. ഇതിലേക്ക് കാന്താരി മുളകും വിതറി കൊടുക്കുക.
- തിരി കളയാതെ പച്ച കുരുമുളക് ഇതിലേക്ക് ചേർക്കുക. പച്ച കുരുമുളക് ലഭിച്ചില്ലെങ്കിൽ ഉണക്ക കുരുമുളക് ചതച്ചതും ചേർക്കാവുന്നതാണ്. രുചിയും ഗുണവും ലഭിക്കാൻ പച്ച കുരുമുളകാണ് നല്ലത്.
- ഒരു നുള്ള് മഞ്ഞൾ പൊടി ചേർത്ത് കൊടുക്കുക. ഇതിലേക്ക് കല്ലുപ്പ് ചേർത്ത് കൊടുക്കുക. തുടർന്ന് കറിവേപ്പില തണ്ട് കളഞ്ഞത് ഇതിന് മുകളിലേക്ക് വിതറുക. ബാക്കിയുള്ള നെല്ലിക്ക ഇതിലേക്ക് ചേർത്ത് കൊടുക്കുക. ആദ്യം ചെയ്തത് പോലെ മറ്റ് ചേരുവകളും ഒന്നൊന്നായി ചേർത്ത് കൊടുക്കുക. അവസാനമായി ഉലുവ പൊടിയും കായപ്പൊടിയും ചേർക്കുക.
- ഒരു കിലോ നെല്ലിക്കയ്ക്ക് ഒരു കപ്പ് വെള്ളമെന്ന രീതിയിൽ ചേർത്ത് കൊടുക്കുക. തുടർന്ന് വാഴയില വാട്ടി മൺകലം കെട്ടുക. പാളേങ്കോടൻ വാഴയുടെ ഇല ഉപയോഗിക്കുന്നതാണ് മെച്ചം. തുടർന്ന് അടുപ്പിൽ വച്ച് തിളപ്പിക്കുക.
പതിനഞ്ച് ദിവസം ഇതുപോലെ തിളപ്പിക്കണം. ഓരോ ദിവസവും തിളപ്പിക്കുന്നതിന് മുൻപ് മൺകലം എടുത്ത് നന്നായി കുലുക്കണം. പതിനഞ്ചാമത്തെ ദിവസം മാത്രമേ കലത്തിനുള്ളിലെ വെള്ളം തീരാൻ പാടുള്ളൂ. പതിനഞ്ചാമത്തെ ദിവസം മൂടി തുറക്കുക. നെല്ലിക്ക കറുത്ത നിറത്തിലായിട്ടുണ്ടാകും. അഥവാ വെള്ളമില്ലെന്ന് തോന്നിയാൽ മാത്രം തുറന്ന് തിളപ്പിച്ചാറിയ വെള്ളം ഒഴിച്ച് കൊടുക്കാവുന്നതാണ്.
അച്ചാറിന്
ആവശ്യമായ ചേരുവകൾ
കടുക്
ഇഞ്ചി, വെളുത്തുള്ളി (ചതച്ചത്)
കടുക് , ഉലുവ (വറുത്ത് പൊടിച്ചത്)
നല്ലെണ്ണ
മുളകുപ്പൊടി
മഞ്ഞൾപ്പൊടി
തയ്യാറാക്കേണ്ട വിധം
നെല്ലിക്ക കറുത്ത് വരുന്നതോടെ അച്ചാർ ഇടാവുന്നതാണ്. നല്ലെണ്ണയിലാണ് അച്ചാർ തയ്യാറാക്കുന്നത്. എണ്ണ ഒഴിച്ച് കടുക് താളിച്ച് ചതച്ച വെളുത്തുള്ളിയും ഇഞ്ചിയും ചേർക്കുക. ഇതിലേക്ക് ഒന്നര ടീസ്പൂൺ മുളകുപ്പൊടിയും ഒരൽപ്പം മഞ്ഞൾപ്പൊടിയും ചേർക്കുക. ഇതിലേക്ക് തയ്യാറാക്കി വച്ചിരിക്കുന്ന കരിനെല്ലിക്ക ചേർത്ത് കൊടുക്കുക.
