തിരുവനന്തപുരം: നിയമസഭാ സമ്മേളനത്തിൽ സംസ്ഥാനത്തെ സഹകരണബാങ്കുകളിലെ ക്രമക്കേടിനെ കുറിച്ചുള്ള ചോദ്യം പിൻവലിച്ച് ഭരണകക്ഷി എംഎൽഎ. സിപിഎം നേതാവും അമ്പലപ്പുഴ എംഎൽഎയുമായ എച്ച്.സലാമാണ് ചോദ്യം പിൻവലിച്ചത്. നിയമസഭാ വെബ്സൈറ്റിൽ നിന്നും ക്രമക്കേടിനെ സംബന്ധിച്ച ചോദ്യം പിൻവലിച്ചിട്ടുണ്ട്. സഹകരണ വകുപ്പ് മന്ത്രി വി.എൻ വാസവനോടാണ് എച്ച്. സലാം എംഎൽഎ ചോദ്യം ഉന്നയിച്ചത്.
സംസ്ഥാനത്ത് സഹകരണ വകുപ്പ് നടത്തിയ പരിശോധനയിൽ ക്രമക്കേട് കണ്ടെത്തിയ സഹകരണ സംഘങ്ങളും സ്ഥാപനങ്ങളും ഏതൊക്കെയാണ്. ഇവ ഭരിക്കുന്നത് ഏത് രാഷ്ട്രീയ പാർട്ടിയുമായി ബന്ധമുള്ളവരാണ്. ഇത്തരത്തിൽ ജില്ല തിരിച്ചുള്ള പട്ടിക വ്യക്തമാക്കാമോ എന്നതായിരുന്നു ഒന്നാമത്തെ ചോദ്യം. ഓരോ സഹകരണ സംഘങ്ങളിലും നടന്ന ക്രമക്കേടുകളെ കുറിച്ച് വ്യക്തമാക്കുമോ എന്നതായിരുന്നു രണ്ടാമത്തെ ചോദ്യം.
എംഎൽഎയുടെ ചോദ്യം 10 ദിവസം മുമ്പ് നിയമസഭാ വെബ്സൈറ്റിൽ പ്രസിദ്ധീകരിച്ചിരുന്നു. സഹകരണ വകുപ്പിന് മുന്നിൽ ചോദ്യം എത്തിയപ്പോഴാണ് കുരുക്ക് പ്രശ്നം മനസിലായത്. വിഷയം ഉദ്യോഗസ്ഥർ ഉടൻ തന്നെ സഹകരണ വകുപ്പ് മന്ത്രിയുടെ ഓഫീസിന്റെ ശ്രദ്ധയിൽപ്പെടുത്തി. വിഷയത്തിൽ സിപിഎം ഇടപെട്ടതോടെയാണ് എംഎൽഎ ചോദ്യം പിൻവലിക്കാനാവശ്യപ്പെട്ട് നിയമസഭാ സെക്രട്ടറിക്ക് കത്ത് നൽകിയത്.
