ന്യൂഡൽഹി: രാജ്യത്ത് മാദ്ധ്യമപഠനത്തിൽ മികച്ച കോഴ്സുകൾ നൽകുന്ന ഇന്ത്യൻ ഇൻസ്റ്റിറ്റ്യൂട്ട് ഓഫ് മാസ് കമ്യൂണിക്കേഷൻ അഥവാ ഐഐഎംസിക്ക് കൽപിത സർവ്വകലാശാല (ഡീംഡ് യൂണിവേഴ്സിറ്റി) പദവി ലഭിച്ചു. കേന്ദ്ര വിദ്യാഭ്യാസ മന്ത്രാലയമാണ് ഇതുസംബന്ധിച്ച ഉത്തരവ് പുറപ്പെടുവിച്ചത്.
ഇതോടെ ഡോക്ടറൽ ഡിഗ്രി ഉൾപ്പടെ വിവിധ ബിരുദങ്ങൾ നൽകാൻ ഐഐഎംസിക്ക് സാധിക്കും. ഡൽഹിയിലുള്ള ഐഐഎംസിയുടെ പ്രധാന ക്യാമ്പസ് കൂടാതെ രാജ്യത്തെ അഞ്ച് റീജിയണൽ ക്യാമ്പസുകൾക്കും പദവി ലഭിക്കുന്നതാണ്. ഐഐഎംസിയുടെ ദക്ഷിണമേഖലാ ക്യാമ്പസ് കേരളത്തിലാണ് സ്ഥിതിചെയ്യുന്നതെന്ന പ്രത്യേകതയുമുണ്ട്. ജമ്മു, അമരാവതി, ഐസ്വാൾ, കോട്ടയം, ധങ്കനൽ എന്നിവിടങ്ങളിലാണ് റീജിയണൽ ക്യാമ്പസുള്ളത്.
1965ൽ ഇൻഫർമേഷൻ ആൻഡ് ബ്രോഡ്കാസ്റ്റിംഗ് മന്ത്രാലയത്തിന് കീഴിൽ ആരംഭിച്ച മാദ്ധ്യമപഠന സ്ഥാപനമാണ് ഐഐഎംസി. മാദ്ധ്യമപഠനം താത്പര്യമുള്ള വിദ്യാർത്ഥികൾക്ക് ഏറ്റവും മികച്ച കോഴ്സുകൾ വാഗ്ദാനം ചെയ്യുന്നതിൽ പേരുകേട്ട സ്ഥാപനമാണിത്. മാദ്ധ്യമവിദ്യാർത്ഥികളുടെ ഐഐടിയെന്നാണ് പലരും ഐഐഎംസിയെ വിശേഷിപ്പിക്കുന്നത്. ഗുണനിലവാരമുള്ള കോഴ്സുകളും പ്ലേസ്മെന്റുമാണ് സ്ഥാപനത്തിന്റെ സവിശേഷത.
എന്താണ് ഡീംഡ്-ടു-ബി-യൂണിവേഴ്സിറ്റി അഥവാ കൽപിത സർവ്വകലാശാല
ഏതെങ്കിലുമൊരു പ്രത്യേക പഠനമേഖലയിൽ ഉയർന്ന നിലവാരത്തിൽ പ്രവർത്തിക്കുന്ന, സർവ്വകലാശാലകൾ അല്ലാത്ത ഉന്നത വിദ്യാഭ്യാസ സ്ഥാപനത്തെ, UGCയുടെ നിർദ്ദേശപ്രകാരം ‘ഡീംഡ്-ടു-ബി-യൂണിവേഴ്സിറ്റി’ ആയി പ്രഖ്യാപിക്കാൻ കേന്ദ്ര സർക്കാരിന് കഴിയും. ഇതനുസരിച്ച് ഒരു സർവ്വകലാശാലയ്ക്ക് ലഭിക്കുന്ന എല്ലാവിധ അക്കാദമിക് പദവിയും പ്രത്യേകാവകാശങ്ങളും സ്ഥാപനത്തിന് ലഭിക്കുന്നു.
