എറണാകുളം: അങ്കമാലിയിൽ 225 കിലോ കഞ്ചാവ് പിടികൂടിയ കേസിൽ ശിക്ഷ വിധിച്ച് കോടതി. കേസിൽ ഒന്നാം പ്രതിക്ക് 36 വർഷം കഠിന തടവും മൂന്ന് ലക്ഷം രൂപ പിഴയും വിധിച്ചു. പെരുമ്പാവൂർ സ്വദേശി അനസിനെയാണ് എറണാകുളം അഡീഷണൽ സെഷൻസ് കോടതി ശിക്ഷിച്ചത്. കേസിൽ രണ്ടും മൂന്നും പ്രതികളായ ചേലാമറ്റം സ്വദേശി ഫൈസൽ, ശംഖുമുഖം സ്വദേശി വർഷ എന്നിവർക്ക് 12 വർഷം തടവും ഒരു ലക്ഷം രൂപ പിഴയും കോടതി വിധിച്ചു.
ആലപ്പുഴ കൊട്ട കാട്ടുശേരി മുനിർ മൻസിലിൽ മുനീർ, അടൂർ വടക്കേടത്തുകാവ് ഷമീർ മൻസിലിൽ ഷമീർ, വെങ്ങോല കണ്ടന്തറ പുളിക്കക്കുടി അബു താഹിർ, ആന്ധ്രപ്രദേശ് സ്വദേശി ബലോർദ ബോഞ്ചു ബാബു, പെരുമ്പാവൂർ ചെന്താരയിൽ മുഹമ്മദ് ഫറൂക്ക് എന്നിവരെ 12 വർഷത്തേക്കും കോടതി ശിക്ഷിച്ചു. രണ്ട് കാറുകളിലായാണ് സംഘം കഞ്ചാവ് കടത്താൻ ശ്രമിച്ചത്. ഒരു വാഹനത്തിൽ 25 കിലോയും രണ്ടാമത്തെ വാഹനത്തിൽ 10 പൊതികളിലായി 200 കിലോ കഞ്ചാവുമാണ് പിടികൂടിയത്.
ഡാൻസാഫ് ടീമും അങ്കമാലി പോലീസും സംയുക്തമായി നടത്തിയ പരിശോധനയിലാണ് കേസിന് ആസ്പദമായ സംഭവം.2021 നവംബർ എട്ടിനാണ് കേസിന് ആസ്പദമായ സംഭവം. അങ്കമാലിക്ക് സമീപം കറുകുറ്റിയിൽ നിന്നും സാഹസികമായി വാഹനം പിന്തുടർന്ന് തടഞ്ഞു നിർത്തുകയായിരുന്നു.
