തിരുവനന്തപുരം: സെർച്ച് കമ്മിറ്റി രൂപീകരിക്കുന്നതിനായി സർവകലാശാലകളോട് പ്രതിനിധികളെ നൽകാൻ ഗവർണർ ആരിഫ് മുഹമ്മദ് ഖാൻ. വൈസ് ചാൻസലർമാരെ നിയമിക്കുന്നതിനായി സെർച്ച് കമ്മിറ്റിയിലേക്ക് സർവകലാശാലാ പ്രതിനിധികളെ നൽകാൻ അടിയന്തര നടപടി കൈക്കൊള്ളണമെന്നാണ് രാജ്ഭവന്റെ നിർദ്ദേശം. കേരള, എം.ജി., കുസാറ്റ്, കണ്ണൂർ, മലയാളം, കെ.ടി.യു., അഗ്രികൾച്ചർ, ഫിഷറീസ് തുടങ്ങിയ സർവകലാശാലകളിലെ വി.സിമാർക്കാണ് രാജ്ഭവനിൽ നിന്ന് കത്തയച്ചത്.
ഒരു മാസത്തിനകം സെർച്ച് കമ്മിറ്റിയിലേക്കുള്ള പ്രതിനിധികളെ നൽകാൻ സർവകലാശാലകൾ തയ്യാറാകണം. അല്ലാത്തപക്ഷം സുപ്രീംകോടതി വിധിയുടെ അടിസ്ഥാനത്തിൽ ഗവർണർ സ്വന്തമായി സെർച്ച് കമ്മിറ്റി രൂപവത്കരിച്ച് വി.സി. നിയമന നടപടികളുമായി മുന്നോട്ടുപോകുമെന്നും കത്തിൽ പറയുന്നു. കേരളത്തിലെ പല സർവകലാശാലകളിലും താത്കാലിക വിസിമാരാണുള്ളത്.
ഇതിനിടെ, കേരള വി.സി. ഡോ. മോഹനൻ കുന്നുമേൽ സെർച്ച് കമ്മിറ്റി പ്രതിനിധിയെ തിരഞ്ഞെടുക്കുന്നതിനായുള്ള സെനറ്റ് യോഗം ഫെബ്രുവരി 16-ന് വിളിച്ചുചേർക്കാൻ രജിസ്ട്രാർക്ക് നിർദ്ദേശം നൽകി.
