കഴിച്ചു കഴിഞ്ഞാൽ നാവും വായയും വയലറ്റ് നിറമാക്കുന്ന ഞാവൽപ്പഴം ബഹുഭൂരിപക്ഷം ആളുകൾക്കും ഇഷ്ടമായിരിക്കും. ഞാവൽ മരങ്ങളിൽ നിന്നും ഉതിർന്നു വീഴുന്ന ഞാവൽ പഴങ്ങൾ പെറുക്കി കഴിക്കാൻ തിരക്കു കൂട്ടുകയും, കഴിച്ചു കഴിഞ്ഞ് നാവിൽ വയലറ്റ് നിറം വന്നിട്ടുണ്ടോയെന്ന് പരസ്പരം നോക്കുകയും ചെയ്യുന്ന കുട്ടികളും അവരുടെ കളിചിരികളും പണ്ടുകാലത്തെ നിത്യക്കാഴ്ചകളായിരുന്നു. കാലം മാറി, ഇന്ന് പലരും കഴിക്കാൻ മടിക്കുന്ന ഫലവർഗങ്ങളിൽ ഒന്നായിരിക്കുന്നു ഞാവലും. നാവിൽ കളർ വരുന്നത് കാണാൻ കഴിച്ചിരുന്ന കാലമായിരുന്നു മുമ്പ് ഉണ്ടായിരുന്നതെങ്കിൽ ഇന്ന് ഇതേ കാരണത്താൽ ഈ പഴത്തെ മാറ്റി നിർത്തുന്നു. നിരവധി ആരോഗ്യ ഗുണങ്ങളുള്ള ഫലവർഗമാണിതെന്ന വസ്തുതയും പലരും അറിയാതെ പോകുന്നു.
ധാരാളം ആന്റി ഓക്‌സിഡന്റുകളാലും മഗ്നീഷ്യം, കാത്സ്യം, വിറ്റാമിൻ B1, B6 എന്നീ പോഷകഘടങ്ങളാലും സമ്പുഷ്ടമാണ് ഞാവൽപ്പഴം. രക്തത്തിലെ പഞ്ചസാരയുടെ അളവ് നിയന്ത്രിച്ച് നിർത്താനും ഓർമ്മശക്തി വർദ്ധിപ്പിക്കാനും ഞാവൽ പഴം കഴിക്കുന്നത് നല്ലതാണ്. ഹൃദ്രോഗങ്ങളെ ചെറുക്കുന്നതിനും ഇത് സഹായകരമാണ്. എന്നാൽ വെറുതെ പഴമായി കഴിക്കാൻ ഇഷ്ടപ്പെടാത്തവരാണ് നിങ്ങളെങ്കിൽ ഇനി ഞാവൽ കിട്ടിയാൽ അച്ചാർ ഇട്ടു കഴിച്ചോളൂ.. ഗുണങ്ങളേറെ..
ചേരുവകൾ
ഞാവൽപ്പഴം- 1/2 കിലോ
ഇഞ്ചി – 2 സ്പൂൺ
വെളുത്തുള്ളി – 8-10 അല്ലി
ഉലുവ – 1/2 സ്പൂൺ
നല്ലെണ്ണ – 4 സ്പൂൺ
കടുക് – ആവശ്യത്തിന്
ചുവന്ന മുളക് – 4 എണ്ണം
കറിവേപ്പില – 2 തണ്ട്
മുളക് പൊടി – 2 സ്പൂൺ
കാശ്മീരി ചില്ലി – 2 സ്പൂൺ
ഉപ്പ് – ആവശ്യത്തിന്
മഞ്ഞൾ പൊടി – 1/2 സ്പൂൺ
കായപ്പൊടി – 1/2 സ്പൂൺ
തയ്യാറാക്കുന്ന വിധം:
ചട്ടി ചൂടാക്കി അതിലേക്ക് നല്ലെണ്ണ ഒഴിച്ച് കടുക് ചേർത്ത് പൊട്ടിക്കുക. ഇതിലേക്ക് ചുവന്ന മുളക്, കറിവേപ്പില, ഇഞ്ചി ചതച്ചത്, വെളുത്തുള്ളി ചതച്ചത് എന്നിവ ചേർത്ത് നന്നായി ഇളക്കുക. ഇതിലേക്ക് ഞാവൽപ്പഴം, മുളകുപൊടി, കശ്മീരി മുളകുപൊടി, ഉപ്പ്, കായം പൊടിച്ചത് എന്നിവ ചേർത്ത് നന്നായി ഇളക്കി 5 മിനുട്ട് മൂടി വയ്‌ക്കുക. ശേഷം മൂടി തുറന്ന് തീ ഓഫാക്കി, നന്നായി ഒന്നുകൂടി ഇളക്കി വയ്‌ക്കുക. ഇത് ചൂട് മാറിയതിനു ശേഷം വായു കടക്കാത്ത കുപ്പിയിലാക്കി സൂക്ഷിക്കാവുന്നതാണ്.
