റിയാദ്: സൗദിയിൽ നടക്കുന്ന ലോക ഡിഫൻസ് ഷോ 2024ൽ ഭാരതത്തിൽ നിന്നുള്ള വനിതകൾ പങ്കെടുക്കും. യുദ്ധവിമാന പൈലറ്റ്, കോംബാറ്റ് എഞ്ചിനീയർ, യുദ്ധക്കപ്പലിൽ സേവനമനുഷ്ഠിക്കുന്നവർ എന്നിങ്ങനെ മൂന്നംഗ പ്രതിനിധി സംഘമാണ് ഡിഫൻസ് ഷോയിൽ പങ്കെടുക്കുക. പങ്കെടുക്കുന്ന വനിതകളുടെ പേരുവിവരങ്ങൾ പുറത്തുവിട്ടിട്ടില്ല. വ്യോമസേനയിലെ ഭാവനാ കാന്ത്, ഇന്ത്യൻ ആർമി കേണൽ പൗങ് ഡോമിംഗ് , നാവികസേനയുടെ ലെഫ്. കമാൻഡർ അന്നു പ്രകാശ് എന്നിവരായിരിക്കുമെന്നാണ് സൂചന.
ഭാരതത്തിന്റെ നാരീശക്തി പ്രദർശിപ്പിക്കാനുള്ള വലിയൊരു അവസരമായിരിക്കും സൗദി അറേബ്യ ആതിഥേയത്വം വഹിക്കുന്ന വേൾഡ് ഡിഫൻസ് ഷോ 2024 എന്നാണ് വിലയിരുത്തൽ. ഇതിന്റെ ഭാഗമായാണ് സായുധ സേനയിലെ പ്രധാന ചുമതലകൾ വഹിക്കുന്ന വനിതാ ഓഫീസർമാരുടെ പ്രതിനിധി സംഘത്തെ ഭാരതം അയച്ചത്. റിയാദിൽ ഫെബ്രുവരി നാലിന് ആരംഭിച്ച ഡിഫൻസ് ഷോ, എട്ടിനാണ് അവസാനിക്കുക.
ലോകത്തിന്റെ പ്രതിരോധ വ്യവസായ മേഖലയിൽ പങ്കാളിയാകാനും അതുസംബന്ധിച്ച വിശദാംശങ്ങൾ പങ്കുവയ്ക്കാനും പ്രതിരോധ മേഖലയിലെ പുത്തൻ കണ്ടുപിടുത്തങ്ങളും സാധ്യതകളും ചർച്ച ചെയ്യാനുമുള്ള സവിശേഷമായ പ്ലാറ്റ്ഫോമായിരിക്കും വേൾഡ് ഡിഫൻസ് ഷോ എന്നാണ് സംഘാടകർ അവകാശപ്പെടുന്നത്.