ഐശ്വര്യ രജനികാന്തിന്റെ ഏറ്റവും പുതിയ ചിത്രമായ ലാൽ സലാമിന്റെ ട്രെയിലർ കഴിഞ്ഞ ദിവസം പുറത്തിറങ്ങിയിരുന്നു. വൻ സ്വീകാര്യത ലഭിച്ച ട്രെയിലറിന് നിരവധി പേർ ആശംസകൾ അറിയിച്ചിരുന്നു. ഐശ്വര്യയുടെ ഭർ‌ത്താവ് ധനുഷും ആശംസകൾ എക്സിലൂടെ അറിയിച്ചിരുന്നു. ദൈവം അനുഗ്രഹിക്കട്ടെ എന്നായിരുന്നു ട്രെയിലർ പങ്കുവച്ചുകൊണ്ട് ധനുഷ് കുറിച്ചത്.
നടൻ ധനുഷും ഭാര്യ ഐശ്വര്യ രജനികാന്തും വേർപിരിഞ്ഞ് താമസിക്കുകയാണെന്ന അഭ്യൂഹങ്ങൾ സമൂഹമാദ്ധ്യമങ്ങളിൽ കുറച്ച് നാളുകളായി പ്രചരിക്കുന്നുണ്ട്. എന്നാൽ, രജനികാന്തുമായി ബന്ധപ്പെട്ടിട്ടുള്ള എല്ലാ പരിപാടികളിലും ധനുഷ് പങ്കെടുക്കാറുണ്ട്. രജനികാന്തിന്റെ ജയിലർ സിനിമയടക്കം ആദ്യ ദിനം തിയേറ്ററിലെത്തി ധനുഷ് കണ്ടിരുന്നു. ഇരുവരും വേർപിരിഞ്ഞ് താമസിക്കുകയാണെങ്കിലും നിയമപരമായി വിവാഹമോചിതരായിട്ടില്ലെന്നാണ് പ്രചരിക്കുന്ന വാർത്തകൾ. ഇതിനിടെയാണ് ധനുഷ് ആശംസകൾ അറിയിച്ചിരിക്കുന്നതെന്നതാണ് ശ്രദ്ധേയം.
സ്പോർട്സ് ഡ്രാമ ജോണറിലാണ് ചിത്രം ഒരുങ്ങുന്നത്. ചിത്രത്തിൽ രജനികാന്തും പ്രധാന വേഷത്തിലെത്തുന്നുണ്ട്. ഇന്ത്യൻ ക്രിക്കറ്റ് ഇതിഹാസം കപിൽ ദേവും ലാൽ സലാമിൽ അഭിനയിക്കുന്നുണ്ട്. വിഷ്ണു വിശാലാണ് ചിത്രത്തിൽ നായക വേഷത്തിലെത്തുന്നത്. പൊങ്കൽ റിലീസായി വരാനിരുന്ന ചിത്രം ഫെബ്രുവരി 9-നാണ് തീയേറ്ററുകളിലെത്തുന്നത്.
Family ❤️🤝 pic.twitter.com/ShwQDXEtfv
— Kolly Corner (@kollycorner) February 5, 2024
