സിനിമാ പ്രേമികൾ ഏറെ ആവേശത്തോടെ കാത്തിരിക്കുന്ന അല്ലു അർജ്ജുൻ ചിത്രമാണ് പുഷ്പ 2. ആദ്യ ഭാഗം നൽകിയ ആവേശം തന്നെയാണ് ഇതിന് കാരണം. ഓഗസ്റ്റ് 15 ന് ചിത്രം തീയേറ്ററുകളിൽ എത്തുമെന്നാണ് അണിയറ പ്രവർത്തകർ അറിയിച്ചിരിക്കുന്നത്. ഇപ്പോഴിതാ പുഷ്പ 2 വൈകും എന്ന തരത്തിലുള്ള വാർത്തകൾ സമൂഹമാദ്ധ്യമങ്ങളിൽ പ്രചരിക്കുകയാണ്.
എന്നാൽ ഈ വാർത്തകളെ പൂർണാമായും നിരസിച്ചിരിക്കുകയാണ് അണിയറ പ്രവർത്തകർ. പ്രഖ്യാപിച്ച തീയതിയിൽ തന്നെ ചിത്രം പ്രദർശനത്തിനെത്തുമെന്നും അറിയിച്ചു. പിന്നാലെ മറ്റൊരു വാർത്തയും സമൂഹമാദ്ധ്യമങ്ങളിൽ പ്രചരിക്കുന്നുണ്ട്. സംവിധായകൻ സുകുമാർ ചിത്രത്തിന്റെ മൂന്നാം ഭാഗത്തെ കുറിച്ചുള്ള ആലോചനകളിലാണ് എന്നാണ് പുതിയ വാർത്ത. മൂന്നാം ഭാഗത്തിന്റെ പ്രഖ്യാപനം ഉടനുണ്ടാകുമെന്നും വാർത്തകളുണ്ട്.
പുഷ്പ റോറ് എന്നായിരിക്കും മൂന്നാം ഭാഗത്തിന്റെ പേര്. ഇത് സംബന്ധിച്ച അപ്ഡേറ്റുകൾ പിന്നാലെ ഉണ്ടാകുമെന്നും തെലുങ്ക് മാദ്ധ്യമങ്ങൾ റിപ്പോർട്ട് ചെയ്യുന്നു. അതേസമയം പുഷ്പ 2 ന്റെ ചിത്രീകരണം അവസാനഘട്ടത്തിലാണ്. ഫഹദ് ഫാസിലടക്കമുള്ള താരങ്ങളുടെ ചിത്രീകരണം പൂർത്തിയായെന്ന വാർത്തകൾ ഇതിനോടകം പുറത്തുവന്നിരുന്നു.
സുകുമാർ സംവിധാനം ചെയ്യുന്ന ചിത്രം ഏറെ പ്രതീക്ഷയോടെയാണ് എത്തുന്നത്. ചിത്രത്തിൽ വില്ലനായാണ് ഫഹദ് ഫാസിലിന്റെ വരവ്. ശരീരഭാഷയിലും പെരുമാറ്റത്തിലും ഇതുവരെ കാണാതിരുന്ന പുത്തൻ ആവിഷ്കാരവുമായാണ് അല്ലു അർജുൻ പുഷ്പയിലെത്തിയത്. പുഷ്പ 2 നിർമ്മിക്കുന്നത് മൈത്രി മൂവി മേക്കേഴ്സാണ്. ചിത്രത്തിന്റെ സംഗീതസംവിധാനം നിർവഹിക്കുന്നത് ദേവിശ്രീപ്രസാദാണ്.