കോട്ടയം: ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ നയിക്കുന്ന കേരള പദയാത്ര ഇന്ന് കോട്ടയം ജില്ലയിൽ. വൈക്കം മഹാദേവ ക്ഷേത്രത്തിൽ ദർശനം നടത്തിയ ശേഷമാണ് പരിപാടികൾക്ക് തുടക്കമിടുന്നത്. ഇന്ന് വൈകിട്ട് മൂന്ന് മണിക്ക് ശേഷം തിരുനക്കരയിലാണ് പൊതുസമ്മേളനം നടക്കുന്നത്. തിരുനക്കര പഴയ ബസ് സ്റ്റാൻഡ് മൈതാനത്ത് നിന്നും ആരംഭിക്കുന്ന പദയാത്ര സംക്രാന്തിയിലാണ് സമാപിക്കുക.
കഴിഞ്ഞ പത്ത് വർഷം കൊണ്ട് നരേന്ദ്രമോദി സർക്കാർ നടപ്പിലാക്കിയ പദ്ധതികൾ ജനങ്ങൾക്ക് മുന്നിലെത്തിക്കാനാണ് പദയാത്ര ലക്ഷ്യമിടുന്നത്. പ്രധാനമന്ത്രി ആവാസ് യോജനയിലൂടെ 2,373 വീടുകൾ നിർമ്മിച്ചു, പ്രധാനമന്ത്രി കിസാൻ സമ്മാൻ നിധിയിലൂടെ പ്രതിവർഷം 1,40,000 കർഷകർക്ക് 6000 രൂപ കൈമാറി, ഉജ്ജ്വല യോജന പദ്ധതിയിലൂടെ 16,416 സ്ത്രീകൾക്ക് ഗ്യാസ് കണക്ഷൻ ലഭിച്ചു തുടങ്ങിയ നിരവധി കേന്ദ്ര പദ്ധതികളാണ് കോട്ടയം ജില്ലയിൽ നടപ്പിലാക്കിയിട്ടുള്ളത്.
ഓരോ ദിവസവും പദയാത്രയ്ക്ക് ജനങ്ങളുടെ ഭാഗത്ത് നിന്നും വലിയ പിന്തുണയാണ് ലഭിക്കുന്നതെന്ന് സുരേന്ദ്രൻ ഫേസ്ബുക്കിൽ കുറിച്ചു. കഴിഞ്ഞ ഏഴ് ദിവസമായി നടന്ന പദയാത്രയിൽ സംസ്ഥാനത്തിന്റെ വിവിധ ഭാഗങ്ങളിൽ നിന്നും ആയിരക്കണക്കിന് പേരാണ് പരിപാടിയിൽ പങ്കെടുത്തത്. കഴിഞ്ഞ ദിവസം മാവേലിക്കരയിൽ നടന്ന കേരള പദയാത്രയിൽ വൻ ജനപങ്കാളിത്തമാണുണ്ടായത്.
