ഈ വാരത്തിൽ ചതയം, പൂരുരുട്ടാതി, ഉത്രട്ടാതി, രേവതി, അശ്വതി, ഭരണി, കാർത്തിക നക്ഷത്രക്കാർ അവരവരുടെ നക്ഷത്രം വരുന്ന ദിവസം വ്രതം അനുഷ്ഠിക്കുന്നതും ക്ഷേത്രത്തിൽ പോയി തൊഴുതു യഥാവിധി വഴിപാടുകൾ നടത്തുന്നത് ഉചിതമായിരിക്കും.
മകര മാസം കഴിഞ്ഞു കുംഭ മാസം ഈ വാരത്തിൽ ആരംഭിക്കും. മാഘ നവരാത്രി ആചരണം ഈ വാരത്തിലാണ്. ഫെബ്രുവരി 13ന്നു ചതുർഥി വ്രതം ആണ്. ഫെബ്രുവരി 14 വാലന്റൈൻ ഡേ മാത്രമല്ല, വളരെ വിശേഷപ്പെട്ട ബാസന്തപഞ്ചമി കൂടെയാണ്. പഞ്ചമി തിഥി 13-ാംതിയതി 2:45 pm മുതൽ തുടങ്ങി 14-ാം തിയതി 12:12 ന് pm ആണ് അവസാനിക്കുന്നത് .
അന്ന് ഷഷ്ഠിയുമാണ്. സൂര്യ ജയന്തി ആയ രഥ സപ്തമി അഥവാ അചല സപ്തമി അഥവാ ആരോഗ്യ സപ്തമി ഫെബ്രുവരി 16ന് ആണ്. സ്വച്ഛന്ദ മൃത്യുവായ ഭീഷ്മർ സ്വശരീരം ഉപേക്ഷിച്ച ഭീഷ്മ അഷ്ടമിയും ഫെബ്രുവരി 16ന് ആണ്.
വാര മാസ ഫലങ്ങൾ ഗണിക്കുന്നത് പൊതുവെ ഉള്ള ഗ്രഹസ്ഥിതി അടിസ്ഥാനപ്പെടുത്തിയാണ്. ഇവിടെ പറയുന്നത് ഒരു പൊതു സൂചന മാത്രമായിരിക്കും. അവരവരുടെ ജന്മ ഗ്രഹനില അനുസരിച്ചു യോഗങ്ങളും ദശാപഹാരവും ഒക്കെകൂടി പരിഗണിച്ചാൽ ഈ പൊതു ഫലത്തിന് ഏറ്റ കുറച്ചിലുകൾ ഉണ്ടാകും. എന്നിരുന്നാലും ഈ പറയുന്ന പൊതുഫലത്തെ സൂചനയായി കണ്ടു, ജാതക നിരൂപണം നടത്തി, ദശാനാഥനെ പ്രീതിപ്പെടുത്തുകയും ഗ്രഹദോഷങ്ങൾ പരിഹരിക്കുകയും ചെയ്താൽ നല്ല സമയത്തിന്റെ ഗുണഫലങ്ങൾ അനുഭവത്തിൽ വരുത്തുവാനും, മോശം സമയം തരണം ചെയ്യുവാനും പ്രയോജനപ്പെടും.
മേടം രാശി: (അശ്വതി, ഭരണി, കാർത്തിക ആദ്യ 1/4 ഭാഗം)
വളരെക്കാലമായി കാണാതിരുന്ന ബന്ധുജനങ്ങളെ കണ്ടുമുട്ടാനും അവരോടൊപ്പം ഉല്ലാസയാത്ര പോകാനും അവസരം വന്നുചേരും. സന്താനങ്ങൾക്ക് പഠന കാര്യങ്ങളിൽ മികവ് പ്രകടിപ്പിക്കും. വരവിൽ കവിഞ്ഞ ചെലവ് പ്രതീക്ഷിക്കാം.
ഇടവം രാശി: (കാർത്തിക അവസാന 3/4 ഭാഗം, രോഹിണി, മകയിര്യം ആദ്യ 1/2 ഭാഗം)
തൊഴിൽ അന്വേഷകർക്ക് തങ്ങളുടെ കരിയറിൽ മികച്ച അവസരം ലഭിക്കും. ഗ്രഹനിലയിൽ ഉള്ള തൊഴിൽ വിഘ്നങ്ങൾക്ക് പരിഹാരം ചെയ്യാൻ ഉചിതമായ സമയം. വിദേശത്ത് ഉള്ള സന്താനങ്ങൾ അവധിക്കാലം ചെലവഴിക്കാൻ വരും. സ്ത്രീ വിഷയങ്ങളിൽ ഇടപെടുമ്പോൾ സൂക്ഷിക്കുക. ഭക്ഷണ സുഖം ലഭിക്കും.
മിഥുനം രാശി: (മകയിര്യം അവസാന 1/2 ഭാഗം, തിരുവാതിര, പുണർതം ആദ്യ 3/4 ഭാഗം)
സുഹൃത്തുക്കളുമായി വാക്കു തർക്കങ്ങളിൽ ഏർപ്പെടാനും അവരുമായി ശത്രുതയിൽ ആകാനും സാധ്യതയുണ്ട്. നാവു സൂക്ഷിക്കുക. തൊഴിൽ വിജയം , ധനലാഭം, ബന്ധുജന സമാഗമം, നിദ്രാ സുഖം എന്നിവ ലഭിക്കും.
കർക്കിടകം രാശി: (പുണർതം അവസാന 1/4 ഭാഗം, പൂയം, ആയില്യം)
അഷ്ടമത്തിൽ ശനി നിൽക്കുന്നത് കൊണ്ട് തന്നെ വളരെയധികം സൂക്ഷിക്കേണ്ട വാരമാണ്. കേസുകൾ, ശത്രു ഭയം, മാനഹാനി, യാത്രാക്ലേശം, അസുഖം എന്നിവ വരാൻ സാധ്യതയുണ്ട്. ക്ഷേത്ര ദർശനം, നിവേദ്യം ഒക്കെ യഥാവിധി അനുഷ്ഠിക്കുക.
ചിങ്ങം രാശി: (മകം, പൂരം, ഉത്രം ആദ്യ 1/4 ഭാഗം)
കുടുംബത്തിൽ മംഗള കർമ്മങ്ങൾക്ക് സാധ്യതയുണ്ട്. വാഹന ഭാഗ്യം, ശയന സുഖം എന്നിവ ഉണ്ടാവും. സന്താനങ്ങളുമായും ഭാര്യയുമായും അഭിപ്രായവ്യത്യാസം ഉണ്ടാകും. അലർജി അസുഖമുള്ളവർ സൂക്ഷിക്കുക.
കന്നി രാശി: (ഉത്രം അവസാന 3/4 ഭാഗം, അത്തം, ചിത്തിര ആദ്യ 1/2 ഭാഗം)
കുടുംബസൗഖ്യം, വ്യവഹാരങ്ങളിൽ വിജയം, ബിസിനസ് പുരോഗതി എന്നിവ ഈയാഴ്ച പ്രതീക്ഷിക്കാം. എന്നിരുന്നാലും രാത്രികാലങ്ങളിൽ യാത്ര ഒഴിവാക്കുന്നത് നല്ലതായിരിക്കും. വിഷ ഭയത്തിനുള്ള സാധ്യതയുണ്ട്. ജലവുമായി ബന്ധപ്പെട്ട ജോലി ചെയ്യുന്നവരും സൂക്ഷിക്കുക.
തുലാം രാശി: (ചിത്തിര അവസാന 1/2 ഭാഗം, ചോതി, വിശാഖും ആദ്യ 3/4 ഭാഗം)
മാനസീക രോഗം, ഉദര രോഗം എന്നിവ വരാൻ സാധ്യത ഉണ്ട് . ശത്രു ജയം, സർവ്വഭോഗതൃപ്തി എന്നിവ വന്നുചേരും. കലാകാരന്മാർക്ക് സമ്മാനങ്ങൾ, അവാർഡ് എന്നിവ ലഭിക്കും. ധനനേട്ടം, പ്രേമകാര്യങ്ങൾ പൂവണിയുക എന്നിവ ഉണ്ടാവും.
വൃശ്ചികം രാശി: (വിശാഖം അവസാന 1/4 ഭാഗം, അനിഴം, തൃക്കേട്ട)
കുടുംബപരമായി വളരെ അധികം പ്രശ്നങ്ങൾ അഭിമുഖീകരിക്കേണ്ടിവരും. അസുഖം മൂർച്ഛിച്ച് സർജറി വരെ എത്താൻ സാധ്യത ഉണ്ട്. അത്തരം അവസരത്തിൽ ജാതക ഗണനം നടത്തി പരിഹാരം അനുഷ്ഠിക്കുന്നത് ഗുണഫലം നൽകും. വാരം അവസാനം സാമ്പത്തീക ലാഭം, ശത്രുനാശം എന്നിവ ഉണ്ടാവും.
ധനു രാശി: (മൂലം, പൂരാടം, ഉത്രാടം ആദ്യ 1/4 ഭാഗം)
ഭാര്യാഭർത്തൃ ഐക്യം കുറയും. പല കാര്യങ്ങളിലും ബുദ്ധി ഉണർന്നു പ്രവർത്തിച്ചതിനാൽ ആളുകളുടെ ഇടയിൽ പ്രശംസ പിടിച്ചുപറ്റും. സത് സുഹൃത്തുക്കളോടൊപ്പം ഉല്ലാസ യാത്ര പോകും.
മകരം രാശി: (ഉത്രാടം അവസാന 3/4 ഭാഗം, തിരുവോണം, ആദ്യ അവിട്ടം 1/2 ഭാഗം)
വാഹനം ഉപയോഗിക്കുമ്പോൾ വളരെ അധികം സൂക്ഷിക്കണം അപകട സാധ്യത ഉണ്ട്. സഹോദരസ്ഥാനത്ത് നിന്നും ഗുണാനുഭവങ്ങൾ ഉണ്ടാവും. സ്വത്തു കാര്യങ്ങളിൽ തീരുമാനം ഉണ്ടാവും. ധനക്ലേശം ഉണ്ടാവും.
കുംഭം രാശി: (അവിട്ടം അവസാന 1/2 ഭാഗം, ചതയം, പൂരൂരുട്ടാതി ആദ്യ 3/4 ഭാഗം)
തൊഴിൽ ക്ലേശം വർദ്ധിക്കുമെങ്കിലും ഉദ്ദേശിച്ച രീതിയിൽ കാര്യങ്ങൾ നടപ്പാക്കാൻ സാധിക്കും. മാതൃ സ്ഥാനത്ത് ഉള്ളവർക്ക് അസുഖങ്ങൾ വർദ്ധിക്കും. വിശിഷ്ട അതിഥികളുമായി സംവദിക്കാൻ അവസരമുണ്ടാകും.
മീനം രാശി: (പൂരൂരുട്ടാതി അവസാന 1/4 ഭാഗം, ഉതൃട്ടാതി, രേവതി)
വരവിൽ കവിഞ്ഞ ചെലവ് പ്രതീക്ഷിക്കാം. മേലധികാരിയുടെ പ്രീതി പിടിച്ചുപറ്റും. അപ്രതീക്ഷിതമായ ചില നേട്ടങ്ങൾ സ്വന്തമാക്കും. ശത്രുക്കൾ മിത്രങ്ങൾ ആകും.
ജയറാണി ഈ വി .
WhatsApp No : 9746812212
(പാരമ്പര്യ ജ്യോതിഷ കുടുംബത്തിലെ അംഗം . ഇരുപതിലേറെ വർഷമായി ജ്യോതിഷം സംഖ്യാശാസ്ത്രം വാസ്തു ആചാര അനുഷ്ഠാന വിഷയങ്ങൾ കൈകാര്യം ചെയ്യുന്നു)
Weekly Prediction by Jayarani E.V