ജന്മനക്ഷത്രവും പക്കപ്പിറന്നാളും അറിയാൻ ഇനി കലണ്ടർ മറിച്ച് നോക്കി പാടുപെടേണ്ട ; വളരെ എളുപ്പത്തിൽ കണ്ടെത്താം; ഇതാ എളുപ്പമാർഗവുമായി പരിഹരപുരം കലണ്ടർ

ജന്മനക്ഷത്രവും പക്കപ്പിറന്നാളും തിഥികളും അറിയുവാൻ കലണ്ടർ നോക്കി ബുദ്ധിമുട്ടുന്നവർക്ക് അനുഗ്രഹമായി ഇക്കുറിയും പരിഹരപുരം കലണ്ടർ.

പക്കപ്പിറന്നാൾ കണ്ടെത്താൻ ആരും സമയം കണ്ടെത്താറുമില്ല, ഓർക്കാറുമില്ലെന്നതാണ് വാസ്തവം. എന്നാൽ പക്കപ്പിറന്നാളും ആണ്ടു പിറന്നാളും കണ്ടുപിടിക്കാൻ ഒരു എളുപ്പവഴിയുണ്ട്. ഇതിന് സഹായിക്കുന്നൊരു കലണ്ടറാണ് സമൂഹമാദ്ധ്യമങ്ങളിൽ വൈറലാകുന്നത്.

ഓരോ നക്ഷത്രത്തിനും പ്രാധാന്യം നൽകിയാണ് ചാർട്ട് തയ്യാറാക്കിയിരിക്കുന്നത്. 12 മാസത്തിലും ഓരോ നക്ഷത്രത്തിനും വരുന്ന പക്കപ്പിറന്നാൾ ഇംഗ്ലീഷ് കലണ്ടർ ദിനവും മലയാള മാസ തീയതിയും ഉൾപ്പടെ ഒറ്റനോട്ടത്തിൽ അറിയാൻ കഴിയും. ചാന്ദ്ര മാസക്കണക്കനുസരിച്ചുള്ള തിഥികൾ ക്ഷേത്ര വിശ്വാസിക്ക് ഒഴിച്ച് കൂടാൻ കഴിയാത്തതാണ്. പ്രധാന തിഥികളായ പ്രദോഷം ഷഷ്ഠി, ഏകാദശി ,കാർത്തിക എന്നിവയും കലണ്ടറിലുണ്ട്.
മുപ്പട്ട് ദിനങ്ങളും അമാവാസിയും പൗർണമിയും ഈ കലണ്ടറിൽ രേഖപ്പെടുത്തിയിട്ടുണ്ട്.

മലബാർ ദേവസ്വം ബോർഡിലെ ഉദ്യോഗസ്ഥനായ ഗിരിധരൻ രാമനാട്ടുകരയാണ് ഈ കലണ്ടർ തയ്യാറാക്കിയത്. കോഴിക്കോട് ജില്ലയിൽ രാമനാട്ടുകര പരിഹാരപുരം ശ്രീ സുബ്രഹ്മണ്യ ക്ഷേത്രത്തിലെ കീഴേടമായ രാമേശ്വരം ശിവക്ഷേത്രത്തിലെ ഉദ്യോഗസ്ഥനാണ് ഗിരിധരൻ രാമനാട്ടുകര. കഴിഞ്ഞ ആറു വർഷമായി അദ്ദേഹം സമാന രീതിയിൽ കലണ്ടർ തയ്യാറാക്കുന്നുണ്ട്.