മലയാളികൾ ഏറെ ആവേശത്തോടെ കാത്തിരിക്കുന്ന ചിത്രമാണ് മഞ്ഞുമ്മൽ ബോയ്സ്. എറണാകുളം ജില്ലയിലെ മഞ്ഞുമ്മൽ നിവാസികളായ ഒരു കൂട്ടം യുവാക്കൾ കൊടൈക്കനാലിലേക്ക് വിനോദയാത്ര പോകുമ്പോൾ ഉണ്ടാകുന്ന പ്രശ്നങ്ങളാണ് സിനിമയിൽ കാണിക്കുന്നത്. ജാനേ മൻ എന്ന ഹിറ്റ് ചിത്രത്തിന് ശേഷം ചിദംബരം സംവിധാനം ചെയ്യുന്ന സിനിമയാണ് മഞ്ഞുമ്മൽ ബോയ്സ്. ചിത്രത്തിന്റെ ട്രെയിലർ പുറത്തുവന്നു.
സസ്പെൻസുകൾ നിറച്ചു വച്ചിരിക്കുന്ന ട്രെയിലറാണ് പുറത്തുവന്നിരിക്കുന്നത്. യുവതാരങ്ങൾ അണിനിരക്കുന്ന ചിത്രം ഒരു സർവൈവൽ ത്രില്ലർ ജോണറിൽപ്പെട്ടതാണ്. മഞ്ഞുമ്മലിലെ ഒരു കൂട്ടം യുവാക്കൾ വിനോദയാത്രക്കായി കൊടൈക്കനാലിലെത്തുന്നു. കൂട്ടത്തിൽ ഒരാൾ ഗുണാകേവിൽ കുടുങ്ങിപ്പോവുകയും തുടർന്ന് സുഹൃത്തിനെ രക്ഷിക്കാനായി ഒപ്പമുളള യുവാക്കൾ നടത്തുന്ന പോരാട്ടവുമാണ് മഞ്ഞുമ്മൽ ബോയ്സിന്റെ കഥാഗതി.
ചിത്രത്തിന്റെ ഓരോ അപ്ഡേറ്റുകളും വളരെ ആവേശഷത്തോടെയാണ് പ്രേക്ഷകർ ഏറ്റെടുത്തിരുന്നത്. പ്രേക്ഷകരുടെ പ്രതീക്ഷകൾ ഒട്ടും കുറക്കാത്ത ട്രെയിലർ തന്നെയാണ് പുറത്തുവന്നിരിക്കുന്നത്. പറവ ഫിലിംസിന്റെ ബാനറിൽ സൗബിൻ ഷാഹിർ, ബാബു ഷാഹിർ, ഷോൺ ആന്റണി തുടങ്ങിയവരും ശ്രീ ഗോകുലം മൂവീസും ചേർന്നാണ് ചിത്രം പ്രേക്ഷരിലേക്ക് എത്തിക്കുന്നത്. മഞ്ഞുമ്മൽ ബോയ്സ് ഈ മാസം തീയേറ്ററിൽ എത്തുമെന്നാണ് അണിയറ പ്രവർത്തകർ അറിയിച്ചിരിക്കുന്നത്.
ഒരു യഥാർത്ഥ സംഭവത്തെ പശ്ചാത്തലമാക്കിയാണ് മഞ്ഞുമ്മൽ ബോയ്സ് ഒരുങ്ങുന്നത്. തമിഴ് താരം ജോർജ് മരിയാനും ചിത്രത്തിൽ ഒരു ശ്രദ്ധേയമായ വേഷത്തിൽ എത്തുന്നു. സൗബിൻ ഷാഹിർ, ശ്രീനാഥ് ഭാസി, ബാലു വർഗീസ്, ഗണപതി, ലാൽ ജൂനിയർ, അരുൺ കുര്യൻ തുടങ്ങിയവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. ചിത്രത്തിന്റെ തിരക്കഥ ഒരുക്കിയിരിക്കുന്നതും സംവിധായകൻ ചിദംബരം തന്നെയാണ്.
