പ്രേക്ഷർ കാത്തിരിക്കുന്ന മമ്മൂട്ടി ചിത്രമാണ് ഭ്രമയുഗം. ചിത്രത്തിന്റെ ട്രെയിലർ റിലീസ് ചെയ്തു. ദുബായിലെ വാഹ്ദ മാളിൽ വച്ചായിരുന്നു ട്രെയിലർ റിലീസ് ചെയ്തത്. ഭീതി ജനിപ്പിക്കുന്ന പൊട്ടിച്ചിരികളും രൂപ ഭാവങ്ങളിലുമാണ് മമ്മൂട്ടി ട്രെയിലറിലുമുള്ളത്. മമ്മൂട്ടിക്കൊപ്പം അർജുൻ അശോകനും സിദ്ധാർത്ഥ് ഭരതനും അമാൽഡ ലിസുമാണുള്ളത്. കാലത്തെക്കുറിച്ചും വിരസതയെക്കുറിച്ചും സൂചിപ്പിച്ച് ഭീതിയിലേക്ക് മനുഷ്യമനസിനെ എത്തിക്കുന്ന തരത്തിലാണ് ട്രെയിലർ.
ചിത്രത്തിന്റെ നിർമാതാവ് രാമചന്ദ്ര, അഭിനേതാക്കളായ അർജുൻ അശോകൻ, സിദ്ധാർത്ഥ് ഭരതൻ, നിർമാതാവ് ആന്റോ ജോസഫ് എന്നിവരും ചടങ്ങിൽ സംബന്ധിച്ചു. പൂർണമായും ബ്ലാക് ആൻഡ് വൈറ്റിൽ പുറത്തിറങ്ങുന്ന ഹൊറർ ചിത്രമാണ് ഭ്രമയുഗം. ഭൂതകാലം എന്ന ചിത്രത്തിനുശേഷം രാഹുൽ സദാശിവൻ സംവിധാനം ചെയ്യുന്ന ചിത്രമാണ്.
മലയാളം, തമിഴ്, തെലുങ്ക്, കന്നഡ, ഹിന്ദി ഭാഷകളിലാണ് ഭ്രമയുഗം പ്രദർശനത്തിനെത്തുന്നത്. ചിത്രത്തിന്റെ തിരക്കഥ നിർവഹിക്കുന്നത് സംവിധായകൻ രാഹുൽ സദാശിവൻ തന്നെയാണ്. നൈറ്റ് സ്റ്റുഡിയോസിന്റെ ബാനറിൽ ചക്രവർത്തി രാമചന്ദ്രനും എസ്. ശശികാന്തുമാണ് നിർമ്മാണം. ഛായാഗ്രഹണം- ഷെഹനാദ് ജലാൽ, എഡിറ്റർ-ഷഫീക്ക് മുഹമ്മദ് അലി, സംഗീതം- ക്രിസ്റ്റോ സേവ്യർ, സംഭാഷണങ്ങൾ- ടി ഡി രാമകൃഷ്ണൻ.
