മലയാള സിനിമയുടെ താരരാജാവ് മോഹൻലാൽ സംവിധാനം ചെയ്യുന്ന ആദ്യ ചിത്രമാണ് ബറോസ്. മാർച്ച് 28 ന് റിലീസിന് തയ്യാറെടുക്കുന്ന ചിത്രത്തിനായി ഏറെ ആവേശത്തോടെയാണ് ആരാധകർ കാത്തിരിക്കുന്നത്. ചിത്രത്തിന്റെ പോസ്റ്റ് പ്രൊഡക്ഷൻ ജോലികൾ പുരോഗമിക്കുകയാണ്. ഇതിനായി മോഹൻലാൽ അമേരിക്കയിലാണെന്ന വാർത്തകൾ കഴിഞ്ഞ ദിവസം പുറത്തുവന്നിരുന്നു.
ഇപ്പോഴിതാ മോഹൻലാൽ പങ്കുവച്ച പോസ്റ്റ് ശ്രദ്ധനേടുകയാണ്. മലയാളികളുടെ ഗാനഗന്ധർവൻ യേശുദാസിനെ അദ്ദേഹത്തിന്റെ വീട്ടിലെത്തി സന്ദർശിച്ചതിന്റെ ചിത്രങ്ങളാണ് അദ്ദേഹം സമൂഹമാദ്ധ്യമങ്ങളിൽ പങ്കുവച്ചിരിക്കുന്നത്.’ ഗാനഗന്ധർവന്റെ വസതിയിൽ, പ്രിയപ്പെട്ട ദാസേട്ടനെ, അദ്ദേഹത്തിന്റെ അമേരിക്കയിലെ വീട്ടിൽ ചെന്ന് കാണാൻ കഴിഞ്ഞ സന്തോഷത്തിൽ.’എന്ന കുറിപ്പോടെയായിരുന്നു മോഹൻലാൽ ചിത്രങ്ങൾ പങ്കുവച്ചത്.
നിരവധി സിനിമകളിൽ മോഹൻലാലിന് വേണ്ടി ഗാനങ്ങൾ ആലപിച്ച് യേശുദാസ് വിസ്മയിപ്പിച്ചിട്ടുണ്ട്. മലയാള സിനിമയുടെ ഭാഗ്യതാരങ്ങളെ വീണ്ടും കാണാൻ സാധിച്ചതിന്റെ സന്തോഷത്തിലാണ് ആരാധകർ. നിലവിൽ മലയാള സിനിമയിൽ യേശുദാസ് സജീവമല്ല. ഏറെക്കാലമായി അദ്ദേഹം കുടുംബസമേതം അമേരിക്കയിലാണ്.