ഫഹദ് ഫാസിലിന്റെ പുതിയ ചിത്രത്തിന്റെ ടൈറ്റിൽ പുറത്ത്. റോയ് സംവിധാനം ചെയ്യുന്ന ചിത്രത്തിന് ‘കരാട്ടെ ചന്ദ്രൻ’ എന്നാണ് ടൈറ്റിൽ നൽകിയിരിക്കുന്നത്. തിയേറ്ററുകളിൽ വൻ വിജയമായി മുന്നേറുന്ന പ്രേമലുവിന്റെ ഗംഭീര വിജയത്തിന് ശേഷമുള്ള ഭാവന സ്റ്റുഡിയോസിന്റെ ആദ്യ പ്രഖ്യാപനമാണ് ഈ ചിത്രം.
ഇക്കാര്യം ഫഹദ് ഫാസിൽ തന്നെയാണ് പുറത്ത് വിട്ടത്. ‘പ്രേമലു നന്ദിലു, ഭാവന സ്റ്റുഡിയോസിന്റെ അടുത്ത ചിത്രത്തിന്റെ വിവരങ്ങൾ ഈ നല്ല സമയത്ത് പങ്കുവെക്കാൻ ആഗ്രഹിക്കുകയാണ്. കരാട്ടെ ചന്ദ്രൻ.’- എന്നായിരുന്നു ഫഹദ് കുറിച്ചത്.
ഫഹദ് ഫാസിലിന്റെ ചിത്രങ്ങളായ ‘മഹേഷിന്റെ പ്രതികാരം’ എന്ന ചിത്രത്തിൽ സഹ സംവിധായകൻ ആയിട്ടും ജോജിയിൽ കോ ഡയറക്ടർ ആയും പ്രവർത്തിച്ച റോയ് ആണ് ചിത്രം സംവിധാനം ചെയ്യുന്നത്. എസ് ഹരീഷും വിനോയ് തോമസും ചേർന്നാണ് ചിത്രത്തിന് തിരക്കഥ രചിക്കുന്നത്.