നടിയും പിന്നണി ഗായികയുമായ വിജയ ലക്ഷ്മി എന്ന മല്ലിക രജപുത്തിനെ തൂങ്ങി മരിച്ച നിലയിൽ കണ്ടെത്തി. 35 വയസായിരുന്നു. ഉത്തരപ്രദേശിലെ സുൽത്താൻപൂരിലായിരുന്നു അന്ത്യം. വീട്ടിലെ ബെഡ് റൂമിൽ തൂങ്ങി നിലയിലാണ് മൃതദേഹം കണ്ടെത്തിയത്. മൃതദേഹം പോസ്റ്റുമോർ‌ട്ടത്തിന് അയച്ച പോലീസ് കേസെടുത്തു.
തങ്ങൾ ഇക്കാര്യം അറിഞ്ഞില്ലെന്നാണ് മല്ലികയുടെ മാതാവ് സുമിത്ര സിംഗ് പറയുന്നത്. ‘വാതിൽ അടഞ്ഞു കിടന്നപ്പോഴും മുറിയിൽ വെളിച്ചമുണ്ടായിരുന്നു. പിന്നീട് വാതിൽ തട്ടി വിളിച്ചപ്പോഴും പ്രതികരണമുണ്ടായിരുന്നില്ല. തുടർന്ന് ജനാല വഴിനോക്കുമ്പോൾ അവൾ ഫാനിൽ തൂങ്ങിക്കിടക്കുന്നതാണ് കണ്ടത്.ഉടനെ ഭർത്താവിനെ വിളിച്ചു”- സുമിത്ര പറഞ്ഞു.
2014ൽ പുറത്തിറങ്ങിയ റിവോൾവർ റാണി എന്ന ചിത്രത്തിൽ കങ്കണയ്‌ക്കൊപ്പം അഭിനയിച്ച മല്ലിക പരിശീലനം നേടിയ കഥക് നർത്തകിയുമാണ്. ഗായകൻ ഷാനിന്റെ ഒരു മ്യൂസിക് വീ‍ഡിയോയിലും അവർ പങ്കാളിയായിരുന്നു. വിവിധ പരിപാടികളിൽ ഗസലുകളും അവർ അവതരിപ്പിച്ചിട്ടുണ്ട്. അസ്വഭാവിക മരണത്തിന് കേസെടുത്ത പോലീസ് അന്വേഷണം ആരംഭിച്ചിട്ടുണ്ട്.
