മമ്മൂട്ടിയും വൈശാഖും വീണ്ടും ഒന്നിക്കുന്ന ചിത്രമാണ് ടർബോ. കഴിഞ്ഞ ദിവസമാണ് സിനിമയുടെ ചിത്രീകരണം പൂർത്തിയായത്. സൂപ്പർ ഹിറ്റുകൾ സമ്മാനിച്ച കൂട്ടുകെട്ട് വീണ്ടും ഒന്നിക്കുമ്പോൾ വളരെ ആവേശത്തിലാണ് ആരാധകർ. ഇപ്പോഴിതാ ടർബോയുടെ പാക്കപ്പിന് ശേഷം ചിത്രത്തിന്റെ അണിയറ പ്രവർത്തകർക്ക് നന്ദി അറിയിച്ചിരിക്കുകയാണ് സംവിധായകൻ വൈശാഖ്. സമൂഹമാദ്ധ്യമങ്ങളിൽ പങ്കുവച്ച കുറിപ്പ് ശ്രദ്ധ നേടുകയാണ്.
‘ ഈ യാത്രയിൽ ഒപ്പം നിന്നവർക്ക് നന്ദി. 104 ദിവസത്തെ തുടർച്ചയായ ഷൂട്ടിംഗ്, ഒരുപാട് ഓർമകൾ, ഒരുപാട് ബന്ധങ്ങൾ. ഫ്രെയിമുകൾക്ക് പിന്നിൽ എനിക്ക് ആത്മവിശ്വാസം നൽകി ഒപ്പം നിന്ന ടീമിന് നന്ദി. നിങ്ങൾ തന്ന പിന്തുണയായിരുന്നു എന്റെ ആത്മവിശ്വാസം’.
‘പ്രിപ്പെട്ട മമ്മൂക്ക നിങ്ങൾ നൽകിയ വലിയ പിന്തുണക്ക് നന്ദി. എത്ര നന്ദി പറഞ്ഞാലും മതിയാകില്ല, കാരണം നിങ്ങളൊരു ജീവരക്ഷകനാണ്. മമ്മൂട്ടി കമ്പനിയുടെ പിന്തുണക്കും നന്ദി. ഒപ്പം നിങ്ങളുടെ പ്രാർത്ഥനക്കും ആശംസകൾക്കും എന്റെ എല്ലാ പ്രിയപ്പെട്ട സുഹൃത്തുക്കൾക്കും ഒരിക്കൽ കൂടി നന്ദി അറിയിക്കുന്നു’. വൈശാഖ് കുറിച്ചു.
മിഥുൻ മാനുവൽ തോമസാണ് ടർബോയുടെ തിരക്കഥ ഒരുക്കുന്നത്. മാസ്- കോമഡി- ആക്ഷൻ ചിത്രമായി എത്തുന്ന ചിത്രത്തിൽ നിരവധി താരങ്ങളും അണിനിരക്കുന്നുണ്ട്. തമിഴിൽ നിന്ന് അർജുൻ ദാസ്, തെലുങ്കിൽ നിന്ന് സുനിൽ, ഹിന്ദിയിൽ നിന്ന് കാബിർ ദുർഹാൻ സിംഗ്, കന്നടയിൽ നിന്ന് രാജ് ബി ഷെട്ടി എന്നിവരും ചിത്രത്തിൽ ശ്രദ്ധേയമായ വേഷത്തിൽ എത്തുന്നുണ്ട്.
മമ്മൂട്ടി കമ്പനി നിർമ്മിക്കുന്ന ചിത്രത്തിന്റെ വിതരണാവകാശം ദുൽഖർ സൽമാന്റെ വേഫെറൽ ഫിലിംസിനും ഓവർസീസ് പാട്‌നർ ട്രൂത്ത് ഗ്ലോബൽ ഫിലിംസ്‌നുമാണ്. വിഷ്ണു ശർമ്മ- ഛായാഗ്രാഹകൻ. ജസ്റ്റിൻ വർഗീസ് സംഗീതം പകരുന്നു. എഡിറ്റർ- ഷമീർ മുഹമ്മദ്. സംഘട്ടനത്തിന് പ്രാധാന്യം ഏറെയുള്ള ചിത്രത്തിന്റെ ആക്ഷൻ കൊറിയോഗ്രഫി നിർവ്വഹിക്കുന്നത് ഫൊണിക്‌സ് പ്രഭു ആണ്.
